lunes, 2 de noviembre de 2026
Durante a súa intervención na clausura da 8ª Reunión Ibérica de Ciencia e Tecnoloxía de Aerosois (RICTA 2024), a directora xeral de Enerxías Renovables e Cambio Climático, Paula Uría, puxo en valor que en todas as estacións da rede de calidade do aire se cumpriron os valores establecidos para a protección da saúde humana, o que, ademais, supón unha boa base para afrontar os novos obxectivos establecidos pola Unión Europea e a OMS para o ano 2030 neste eido.
De feito, a Xunta realizou xa unha análise para coñecer a repercusión na calidade do aire de Galicia dos novos parámetros de cara a 2030. Nesa liña, analizáronse os datos recollidos pola Rede de Estacións no período 2018-2022 en base aos parámetros da nova directiva. A maiores, fíxose unha proxección das emisións na Comunidade en 2030, coa que se realizou unha simulación do estado da calidade do aire á que tamén se lle aplicaron os novos valores límite.
Nesa liña, a directora xeral lembrou que a rede de estacións galega -composta por 47 instalacións- é unha das mellores e máis completas de todo o país grazas a un proceso constante de renovación, ampliación e optimización, que permite unha boa cobertura de todo o territorio.
Ademais, logo de subliñar que Galicia é a única comunidade que conta cun Laboratorio de Medio Ambiente que está acreditado para a realización das análises dos contaminantes do aire ambiental, Uría incidiu en que a Xunta constituíu o pasado ano o Consello Galego de Calidade do Aire como espazo transversal para promover a participación activa e responsable da sociedade galega nesta materia e como plataforma de intercambio de información entre administracións, empresas, sector académico e cidadanía.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
