jueves, 24 de septiembre de 2026
Turismo de Galicia participa desde hoxe e ata o xoves na ITB de Berlín, unha das feiras profesionais con máis repercusión no mercado turístico mundial na que o Goberno autonómico está a levar o seu plan de promoción internacional de destino.
Galicia participa cun espazo propio dentro do expositor de Turespaña, coordinado pola Oficina Española de Turismo en Berlín, con mostradores de información e unha área específica de encontros de traballo. No espazo galego está tamén representado o Clúster Turismo de Galicia, que asiste á feira en misión comercial con diferentes empresarios e profesionais do sector turístico galego.
O Goberno autonómico continúa así afondando na súa estratexia de internacionalización do destino, despois de que o ano pasado o mercado internacional acadase os mellores datos da súa historia e o turismo estranxeiro chegase a representar o 30% do turismo que recibiu a Comunidade galega. No caso concreto do mercado alemán, é o terceiro internacional en Galicia, por detrás de Portugal e EEUU, e tamén é o terceiro país do que proceden máis peregrinos que recollen a Compostela.
O ano pasado aloxáronse nos establecementos turísticos galegos máis de 170.000 viaxairos alemáns que fixeron preto de 300.000 noites, superando un 8,2% o volume de noites do ano anterior, así como os niveis previos á pandemia, nun 9,7% neste caso. O ano pasado rexistráronse incrementos de maior intensidade na temporada baixa fronte á media e alta no mercado alemán que tamén incrementou a súa estadía un 3%.
A participación de Turismo de Galicia na ITB de Berlín enmárcase na actividade que anualmente leva a cabo para promover o destino en distintas feiras, que este ano ascenden ao redor de 30 de ámbito nacional e internacional.
A Consellería de Educación vai dotar aos centros educativos de apoios específicos de acompañamento, formación e recursos materiais para desenvolver os novos programas de reforzo Avanza Lectura e Avanza Matemáticas, que se van poñer en marcha este curso en Primaria ao abeiro do novo Marco galego para o impulso educativo. O conselleiro Román Rodríguez reuniuse co Consello Escolar de Galicia para avaliar o inicio de curso e dar conta das accións da Xunta enfocadas a 'reforzar aprendizaxes apoiando a quen máis o precise, fomentar a cultura do esforzo e impulsar unha mellora integral e continua do sistema'.
O Consello da Xunta analizou na súa reunión de hoxe un informe da Consellería do Medio Rural sobre o anteproxecto de Lei de loita contra os incendios forestais de Galicia (LLCIF), antes da súa remisión para consulta ao Consello Forestal de Galicia, cuxa reunión está prevista para mañá martes. A futura normativa prioriza reforzar a protección da poboación e a xestión integral do territorio. O presidente do Goberno autonómico, Alfonso Rueda, lembrou que actual lexislación sobre incendios forestais 'ten case 20 anos' e 'cómpre actualizarla e adaptala aos novos tipos de lumes así como aos avances que houbo tanto na loita como na prevención de incendios'.
