lunes, 26 de octubre de 2026
O director xeral de Cultura, Anxo M. Lorenzo, avanzou hoxe os principais fitos do programa expositivo da Xunta de Galicia para o ano 2024 no marco da presentación Galicia Expo na Feira Internacional de Turismo (Fitur) en Madrid.
Tras un ano de gran actividade cultural con destacados proxectos como Picasso branco no recordo azul, Sorolla en Galicia ou a celebración dos 30 anos do CGAC (Centro Galego de Arte Contemporánea), a nova programación dá continuidade ao traballo de calidade e innovación feito, sinalou Anxo M. Lorenzo, que se mostrou confiado con que o calendario de 2024 axudará a consolidar a posición de Galicia como unha referencia cultural.
Neste senso, o representante da Consellería de Cultura, Educación, FP e Universidades salientou que a Cidade da Cultura, o CGAC ou o Mosteiro de San Martiño Pinario serán algúns dos espazos máis relevantes na programación prevista por parte da Xunta.
Propostas con eco internacional
Así, o Gaiás ocupa un papel protagonista ao acoller unha das principais propostas internacionais anunciadas para este ano: a mostra Tesouros Reais. Obras mestras do Terra Sancta Museum que se poderá visitar, como único destino en España, entre os meses de marzo e agosto. Trátase dunha exposición internacional que amosará en Santiago o extraordinario e pouco coñecido tesouro artístico do Terra Sancta Museum de Xerusalén, composto de doazóns das monarquías católicas europeas ao longo de 500 anos.
Neste mesmo senso, destaca a presenza de Galicia na celebración da XXVII edición da exposición Las Edades del Hombre que no 2024 terá unha dobre sede: Santiago de Compostela e Vilafranca do Bierzo (León), froito da colaboración da Xunta e a Junta de Castilla y León. Este proxecto cultural, nado en 1988, chegará ao Mosteiro de San Martiño Pinario coa exposición Hospitalitas. A graza do encontro, cunha innovadora montaxe.
Antón Lamazares, protagonista no CGAC
Pola súa banda, o CGAC abrirá o seu programa expositivo cun percorrido pola produción artística de toda a traxectoria profesional de Antón Lamazares coa mostra Antón Lamazares, Inda é día que se poderá visitar a partir do mes de febreiro da man do comisario António Gonçalves. Trátase dunha oportunidade para viaxar no tempo tendo como horizonte o traballo e a entrega dun dos artistas máis singulares de Galicia.
Cidades no tempo e artes dixitais
En 2024 entra tamén na súa recta final o gran proxecto expositivo Cidades no tempo, composto por sete mostras singulares nas sete principais cidades galegas, que chegará en marzo a Ourense e en xuño a Pontevedra nas súas dúas derradeiras entregas. Cidades no tempo reivindica a Galicia urbana como compoñente clave da identidade e cultura galegas, cun legado que se remonta séculos na historia. A iniciativa é froito da colaboración entre a Xunta de Galicia, a través da Fundación Cidade da Cultura, e a Afundación (Obra Social ABANCA), cuxas sedes acollen as exposicións con Manuel Gago como comisario.
Ademais, Galicia continuará apostando en 2024 por proxectos como Galivero ou Hábitats. Natureza estendida, dúas instalacións inmersivas de cultura dixital que ofrecen na Cidade da Cultura, entre outras localizacións, a posibilidade de achegarse ao patrimonio material e inmaterial de Galicia e a biodiversidade do planeta terra e que veñen de ser recoñecidas polo prestixioso Obervatorio da Cultura da Fundación Contemporánea.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
