lunes, 2 de noviembre de 2026
O número de doantes de órganos cadáver en Galicia sitúase en 109 (61 na provincia da Coruña, 8 na de Lugo, 19 na de Ourense e 21 na de Pontevedra); datos que supoñen que haxa unha taxa de 40,5 de doantes por cada millón de habitantes, superando en medio punto as recomendacións da ONT (Organización Nacional de Transplantes).
No que se refire á causa da morte dos doantes, os factores principais foron os accidentes cerebro vasculares, co 53 %, seguido de encefalopatía anóxica cun 15 %, e dos traumatismos craneoencefálicos por accidente non de tráfico, cun 10 %, mentres que de accidentes de tráfico foi o 6 %, correspondendo un 17 % a outras causas. No que respecta á idade media dos doantes, foi de 60,6 anos.
Dende o inicio do programa de transplantes en Galicia ata o final do 2023, en Galicia rexistráronse máis de 3.400 doantes de órganos.
Na actualidade, os pacientes en espera para transplante son un total de 216, a metade que hai 10 anos (ano 2013), que eran 425.
Negativas familiares
Un dato a salientar é a baixada da resposta negativa de familiares no 2023, que foi do 15,5 %, tres puntos menos que no exercicio anterior, o que ratifica a consolidación da tendencia descendente das mesmas nos últimos anos. Por outra banda, cómpre destacar que, na actualidade, en Galicia hai 124.285 persoas que posúen a tarxeta de doador de órganos. Destas, 2.612 son novas tarxetas rexistradas ao longo do 2023 pola Coordinación de Transplantes de Galicia de ADOS.
No que respecta á doazón de medula ósea, Galicia rexistrou 870 novos doantes ao longo do ano 2023. Desta forma, contamos con 14.393 doantes activos no REDMO (Rexistro de Doantes de Medula Ósea). Sendo de salientar que se realizaron 15 doazóns activas, sete máis que no ano anterior.
Accións educativas
Así mesmo, lembrar que a Coordinación de Transplantes de Galicia efectuou 137 charlas no curso académico 2022-2023, para fomentar a doazón, e nas que participaron máis de 6.400 alumnos e alumnas de centros educativos de toda Galicia.
Ademais, convocouse no pasado curso escolar o VIII Concurso Universitario de curtametraxes sobre doazón e transplante de medula ósea; o V Concurso escolar de carteis relacionados coa doazón e os transplantes de órganos para estudantes de 5º e 6º de primaria e 1º, 2ºe 3º da ESO; e o IXConcurso de curtametraxes para escolares relacionados coa doazón e os transplantes de órganos, dirixido ao alumnado de bacharelato e ciclos formativos de grao básico, medio e superior.
Accións formativas
A Coordinación Autonómica de Transplantes de ADOS continuou a desenvolver, durante 2023, o programa de formación especializado en doazón e transplantes de órganos para os profesionais do sistema público de saúde de Galicia, no que se levaron a cabo nove cursos sobre procesos de doazón e transplantes, que foron realizados por máis 3.000 profesionais sanitarios.
O Servizo Galego de Saúde e a Axencia de Doazón de Órganos e Sangue (ADOS) queren facer un recoñecemento público a doantes e familiares pola xenerosidade e valentía que amosan neses momentos tan difíciles. Tamén queren agradecer a toda a sociedade e aos profesionais dos hospitais galegos, xa que son eles os artífices de que as cifras de transplantes continúen aumentando en Galicia.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
