martes, 2 de diciembre de 2025
Rueda salientou que o Goberno galego xa ten en marcha cos concellos un operativo de 200 profesionais para recoller estes pellets e tamén outros residuos plástico que se detectan nos areais e adiantou que se reforzarán ata os 300 nesta fin de semana. De igual xeito, explicou que se está a monitorizar a situación en todas as praias afectadas co obxectivo de retirar canto antes os pellets que vaian chegando. Ademais, garantiu que o operativo de limpeza da Xunta continuará activo e en alerta ata que non queden ningún destes residuos nas praias.
Xa e canto antes os medios do Goberno central
O presidente demandou que ante este compromiso da Xunta o do Goberno central sexa o mesmo, en canto ás súas competencias no mar na loita contra a contaminación e reclamou que non se poñan escusas. Por iso, tras ter elevado o Plan de Contaminación Mariña Accidental de Galicia (Camgal) ao nivel 2, Rueda lembrou que a Administración galega ten demandado medios para a detección dos residuos no mar e para que estes non cheguen ás praias, en referencia a solicitude de sete lanchas, catro barcos, un avión e dous helicópteros e un submarino.
No entanto, lamentou que, pasadas máis de 48 horas da petición destes medios, Galicia continúa sen ter eses medios comprometidos polo Goberno central. Polo tanto, reclamou que os envíe xa e canto antes para colaborar coa Xunta e cos concellos na loita contra esta contaminación, dentro do ámbito das súas competencias, que é a mariña, lembrou.
Todos os sacos que se intercepten no mar son pellets que non chegarán á costa, argumentou ao respecto. Sempre vai ser moito máis sinxelo mentres estean nestes sacos na auga, e non que se estraguen e cheguen ás praias, advertiu. Cada pellet que chegue as praias é un pellet que non se recolleu no mar, afondou, sobre a necesidade da actuación antes de que cheguen a terra.
Información á Fiscalía e nova reunión Camgal
En paralelo á limpeza das praias, o presidente explicou que o Goberno galego vai remitir á Fiscalía toda a información da que dispón a Xunta para que se aclaren todas as circunstancias relacionadas con esta vertedura. Nós somos primeiros interesados de que se chegue ao final de todo isto para determinar os responsables, aseverou. De igual xeito, adiantou que a Xunta traballará co sector pesqueiro e co sector turístico para evitar calquera dano a súa Imaxe.
Ademais, informou de que esta tarde volverá celebrarse unha nova reunión do Plan Camgal, un encontro ao que se ten convidado a participar á Delegación do Goberno en Galicia e tamén a representantes da Fegamp, xa que o mandatario galego considerou necesaria a súa participación.
Nesta reunión avanzou que se abordarán o protocolo de recollida dos pellets e tamén outro para organizar as persoas voluntarias que queren botar unha man na recollida destes residuos nas praias, e ás que lle agradeceu a súa colaboración.
A Xunta de Galicia rexeita o Expediente de Regulación Temporal de Emprego (ERTE) que vén de presentar a dirección da planta de Sargadelos en Cervo, ao tempo que insta á reanudación da actividade canto antes en defensa dos dereitos das persoas traballadoras. Como autoridade laboral, o Goberno galego aprecia incongruencia na solicitude presentada ao non axustarse á normativa aplicable e demanda información e documentación adicional á dirección da empresa. Así mesmo, reafirma que como non pode ser doutro xeito velará polo cumprimento da lexislación laboral e denunciará calquera ilegalidade que se detecte.
A Consellería de Sanidade publica o informe de actividade das infeccións respiratorias agudas correspondente á semana do 17 ao 23 de novembro, que sinala que a actividade gripal en Galicia segue con intensidade baixa e tendencia crecente. Respecto da semana anterior, rexístrase un aumento na taxa de consultas por gripe en atención primaria dun 40,3 %. Así, esta taxa sitúase en 72,1 consultas por 100.000 habitantes. Produciuse aumento da taxa en todos os grupos de idade, destacando o grupo de 0 a 4 anos cun aumento do 78 %. Os grupos coa maior taxa de consultas seguen a ser o de 0 a 4 anos con 188,4 consultas por 100.000 habitantes. No que atinxe ás áreas sanitarias, incrementáronse as consultas en todas elas, duplicándose o valor na área de Vigo e rexistrando un aumento das súas taxas as áreas de Ourense (96,6 %) e de Lugo (79,3 %).
