sábado, 7 de noviembre de 2026
O director xeral de Cultura da Xunta de Galicia, Anxo M. Lorenzo, recibiu hoxe os 40 creadores emerxentes que ata o vindeiro xoves 31 de agosto participan no Gaiás na décimo terceira edición do Encontro de Artistas Novos Cidade da Cultura de Galicia, EAN13, onde poderán presentar publicamente os seus traballos e aprender de figuras consolidadas neste foro aberto ao intercambio de ideas, experiencias e procesos creativos.
O XIII Encontro de Artistas Novos está impulsado pola Xunta de Galicia a través da Fundación Cidade da Cultura e conta coa colaboración da Fundación Banco Sabadell. Trátase dunha das citas máis consolidadas da programación da Cidade da Cultura, da que forma parte desde 2011. Ata o momento, teñen pasado por este encontro destinado a apoiar a novos talentos da creación contemporánea máis de 700 artistas.
O representante da Consellería de Cultura, Educación, FP e Universidades lembrou que, a través do EAN, o Goberno galego reafirma o seu compromiso coa creación contemporánea, impulsando un encontro que tras 13 anos é xa un referente na Península, por onde pasaron artistas que hoxe exhiben en galerías, museos e centros culturais de todo o mundo. O Encontro de Artistas Novos, remarcou, é un espazo de convivencia e diálogo para compartir experiencias entre creadores de dentro e fóra de Galicia, con múltiples e moi diferentes perspectivas vitais e profesionais: na súa cerna atopamos os principios de acollida, apertura e intercambio que tamén están presentes no espírito da propia identidade galega.
A apertura o EAN13 contou tamén coa participación do director Territorial Noroeste de Banco Sabadell, Adolfo García-Ciaño; do director do EAN, Rafael Doctor, e da directora xerente da Fundación Cidade da Cultura, Ana Isabel Vázquez. O programa do Encontro arrancou, ademais, coa conferencia inaugural do fotógrafo, creador audiovisual, escritor e editor Alberto García-Alix (León, 1956).
Ao longo da súa extensa carreira, García-Alix exhibiu en centros de arte como o Museo del Prado, o Reina Sofía, a Maison Européenne de la Photographie en París ou o Museo Casa da Fotografía de Moscova e foi galardoado, entre outros recoñecementos, co Premio Nacional de Fotografía, o de PHotoEspaña ou a Medalla de Ouro ao Mérito nas Belas Artes de España, ademais de ser nomeado en 2012 Cabaleiro da Orde das Artes e das Letras de Francia.
Diálogo entre artistas consolidados e emerxentes
Ademais de García-Alix, os 40 novos talentos participantes no Encontro terán a oportunidade de aprender doutras tres destacadas figuras das artes plásticas, nun enriquecedor diálogo aberto entre artistas emerxentes e consolidados. Por unha banda, a fotógrafa Estela de Castro (Madrid, 1978), especializada no xénero do retrato que saltou á palestra mediática polo seu traballo como autora dos retratos oficiais da Familia Real en 2020; ou Beatriz Ruibal (Pontevedra, 1969), que conta cun abundante corpo de traballo fotográfico e cinematográfico arredor de temas como a ausencia, a memoria, o esquecemento e a nostalxia. Por último, o EAN despedirase o xoves coa conferencia do recoñecido fotógrafo galego Vari Caramés (Ferrol, 1953).
Tamén ata o xoves, os artistas emerxentes participantes poderán darlle visibilidade ao seu traballo no xa clásico Foro Aberto, onde realizarán unha presentación centrada no seu proxecto creativo persoal, servindo de plataforma e escaparate das súas creacións.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
