domingo, 26 de octubre de 2025
A Alianza Galega polo Clima, promovida pola Xunta, sumou o apoio de Anfaco-Cecopesca co obxectivo de seguir creando sinerxías na loita contra o quecemento global, tal e como explicou a vicepresidenta segunda e conselleira de Medio Ambiente, Territorio e Vivenda, Ángeles Vázquez, durante a sinatura do convenio de adhesión por parte desta organización do complexo mar-industria.
Logo de salientar que esta Alianza conta xa con 74 entidades adheridas -universidades, autoridades portuarias, clubes deportivos, empresas e outras entidades-, Ángeles Vázquez incidiu na importancia do apoio de Anfaco-Cecopesca a unha iniciativa que segue reunindo esforzos que permitan situar a Galicia á cabeza das rexións europeas na loita contra o cambio climático.
Cómpre lembrar que esta Alianza supón asumir as liñas estratéxicas marcadas polo Goberno galego nesta materia e unha serie de deberes como establecer accións dirixidas á adaptación ou mitigación do cambio climático en Galicia; fomentar o intercambio de información científica, tecnolóxica, socioeconómica ou xurídica sobre este tema; promover e apoiar a investigación vinculada ao clima, e acelerar o desenvolvemento e a difusión de tecnoloxía para a transición cara a sistemas de enerxía de baixas emisións.
Nesa liña, a vicepresidenta segunda salientou a relevancia de que Anfaco-Cecopesca se adhira a esta iniciativa dada a súa relevancia como axente dinamizador do complexo mar-industria a través da defensa dos intereses de máis de 255 empresas, o que converte esta organización nun referente a nivel nacional e internacional dentro do seu sector.
Logo de salientar o traballo desta entidade a prol da promoción da calidade, a investigación, o desenvolvemento tecnolóxico e a innovación no campo da conservación dos produtos de pesca, a conselleira incidiu en que se trata dun clúster socialmente responsable e sostible, cuxa cooperación será fundamental no obxectivo de deixar unha Galicia mellor ás novas xeracións.
Fitos acadados e desenvolvemento lexislativo
De feito, a conselleira subliñou que Galicia xa acadou fitos decisivos para mellorar a súa capacidade de resiliencia ante o cambio climático. Somos a segunda comunidade que máis reduciu as emisións de gases de efecto invernadoiro en 2021, dixo Ángeles Vázquez, quen lembrou que tamén se conseguiu a redución dun 34% de emisións brutas de GEI respecto a 1990 -ano que se toma de referencia-, máis de 34 puntos porcentuais por enriba da media nacional.
Ademais, segundo salientou a conselleira, 1 de cada 5 toneladas de carbono que se absorben en España faise en Galicia -9,7 millóns de toneladas en 2021-, o que a converte na primeira comunidade do Estado nesta materia.
E, a maiores, o Goberno galego está a traballar no desenvolvemento de proxectos lexislativos como a lei do clima ou a lei de promoción dos beneficios sociais e económicos dos proxectos que utilicen os recursos naturais da Comunidade co obxectivo de garantir tanto a preservación dos nosos ecosistemas e da nosa biodiversidade como a fixación de poboación no rural.
ANFACO-CECOPESCA
Pola súa banda, ANFACO-CECOPESCA considerou que a adhesión á Alianza Galega polo Clima supón un paso lóxico e acertado para continuar impulsando a colaboración público-privada en beneficio da sociedade e do futuro do planeta.
De feito, o complexo mar-industria, representado por esta entidade, leva décadas comprometido co medio ambiente e a loita contra o cambio climático, establecendo metodoloxías e cálculos de pegada hídrica e de carbono, reducindo emisións con plans que inclúen enerxías renovables nos seus procesos e compensando o CO2 emitido con programas de absorción.
O Centro Dramático Galego colgará de novo o cartel de entradas esgotadas nas tres últimas funcións do seu espectáculo A serie clopen esta fin de semana no Salón Teatro de Santiago de Compostela, onde terá sido visto por arredor de 5500 persoas desde a súa estrea o pasado 11 de setembro. Tras os 33 pases ofrecidos na sede da compañía da Xunta, tamén completando as butacas dispoñibles en varias ocasións, o espectáculo iniciará a finais de mes unha xira que o levará a outros cinco escenarios de Galicia e Portugal. Así, a proposta dirixida por Pablo Reboleiro representarase o 30 de outubro no Teatro Académico de Gil Vicente de Coímbra como parte da programación da Mostra Galiza Coimbra 2025, organizada polos colectivos Cena Lusófona e A Escola da Noite e que conta co apoio económico da Consellería de Cultura, Lingua e Xuventude para ofrecer unha escolma de producións escénicas galegas, entre outras moitas actividades artísticas e formativas.
As empresas galegas que empregan Intelixencia artificial son xa o 15,7%, tras experimentar un crecemento do 51,1% no último ano. Crece tamén o uso do Cloud Computing, que pasou do 31,5% ao 38,2% no mesmo período de tempo. Son datos da enquisa sobre o uso das TIC e do comercio electrónico nas empresas 2024/2025, publicada hoxe polo Instituto Nacional de Estatística (INE) e que constatan o crecemento sostido das tecnoloxías innovadoras no tecido produtivo galego. Outro dos indicadores do grao de dixitalización das empresas galegas é a incorporación dos especialistas TIC. O 13,1% das empresas de máis de 10 empregados conta con este perfil profesional, un 4% máis no último ano, o que a converte a Galicia na novena Comunidade Autónoma con máis proporción de especialistas TIC no tecido empresarial.
