viernes, 24 de octubre de 2025
O director xeral de Comercio e Consumo, Manuel Heredia, e a xerente da Fundación Artesanía de Galicia, Elena Fabeiro, participaron esta mañá na inauguración da 39 edición da feira de artesanía Mostrart, que se celebra nos xardíns de Méndez Núñez da Coruña ata o 27 de agosto. Durante a súa intervención, Heredia fixo fincapé na importancia deste evento como unha das feiras de referencia na comercialización do produto artesán e no papel que desenvolve na visibilización e consolidación da marca Artesanía de Galicia entre os consumidores.
Nesta edición de Mostrart participan un total de 53 profesionais da marca Artesanía de Galicia, así como 14 talleres artesanais doutras comunidades españolas e un de Francia. A feira, organizada pola Asociación Galega de Artesáns, conta co apoio da Xunta de Galicia e estará aberta todos os días ata o 27 de agosto en horario de 11:00 a 14:00 horas e de 17:30 a 22:00 horas.
Entre os participantes galegos desta 39 edición atópanse os obradoiros de coiro Chueco (A Coruña), Cabuxa (Tui), coIRaxe (Vigo), Tres caracoles (Lugo), Bruxarte (Vigo), Coiro tres pés (Pontevedra), Manolo Cremallera (A Coruña), Chorima (O Porriño), Encoiros (Redondela), Rappa (Lugo), Uxía Castro (Mos), Vidal Revilla (Cervo) e Santín (A Coruña); os obradoiros dedicados ao calzado Laia zapateiros (Melide) e Zapaterías Rodríguez (A Coruña).
No téxtil destacan os obradoiros especializados en tecido artesanal Artefíos (A Coruña), Cuaderna Maestra (Pontevedra) e Liño de Galicia (Vimianzo); os de complementos de moda A Sariña Maquinando (Ourense), Geli Fraga (A Coruña), Las flores de Greta (Gondomar), Pasamarela (A Coruña) e Melena de papel (Cangas); o taller Encaixes Melania (Camariñas); María Feijóo (Santiago de Compostela), especializada en pintura sobre seda; e Taller Patapúm (Quiroga), en decoración de teas.
No eido da xoiería e ourivería poderanse ver as pezas dos obradoiros Xakarandá (Bueu), A Feitura (A Coruña), Ardentia (Bergondo), Carla Alfaia (A Coruña), Zimzelatum (Gondomar), Laura Triñanes (Santiago de Compostela), Mario López (Vigo), Rosa Higuero (Cabanas), Sánchez Cano Orfebres (Vigo) e Taller Cruz (Pontevedra). En canto á bixutería, participan en Mostrart Silvereira (Ames), Artesanía Nia (A Coruña), Paz Navas (A Coruña) e Joyas de papel (Nigrán); ademais de Montse Betanzos (O Grove), que recolle o oficio das colareiras.
O cartel de expositores de Artesanía de Galicia complétase co taller de escultura Enbabia Bronce (Redondela); os obradoiros especializados en torneado de madeira Armaior (Quiroga), Cunqueiro (Palas de Rei) e Flecharte (Vigo); os de xoguetes Enxógate (Quiroga) e Lucecús (Vilalba); os talleres de cerámica Otero Regal (Viveiro) e Lama e lume (Miño); o obradoiro especializado en manipulado de papel Mioco Deseños (Ordes); Ventanas al pasado (Ponteareas), especializado en miniaturas; e mais os obradoiros de arranxos florais Taller Viola (Oza dos Ríos), especializado en lámpadas con flores secas, e Amodiño Arte Floral (A Coruña).
O Centro Dramático Galego colgará de novo o cartel de entradas esgotadas nas tres últimas funcións do seu espectáculo A serie clopen esta fin de semana no Salón Teatro de Santiago de Compostela, onde terá sido visto por arredor de 5500 persoas desde a súa estrea o pasado 11 de setembro. Tras os 33 pases ofrecidos na sede da compañía da Xunta, tamén completando as butacas dispoñibles en varias ocasións, o espectáculo iniciará a finais de mes unha xira que o levará a outros cinco escenarios de Galicia e Portugal. Así, a proposta dirixida por Pablo Reboleiro representarase o 30 de outubro no Teatro Académico de Gil Vicente de Coímbra como parte da programación da Mostra Galiza Coimbra 2025, organizada polos colectivos Cena Lusófona e A Escola da Noite e que conta co apoio económico da Consellería de Cultura, Lingua e Xuventude para ofrecer unha escolma de producións escénicas galegas, entre outras moitas actividades artísticas e formativas.
As empresas galegas que empregan Intelixencia artificial son xa o 15,7%, tras experimentar un crecemento do 51,1% no último ano. Crece tamén o uso do Cloud Computing, que pasou do 31,5% ao 38,2% no mesmo período de tempo. Son datos da enquisa sobre o uso das TIC e do comercio electrónico nas empresas 2024/2025, publicada hoxe polo Instituto Nacional de Estatística (INE) e que constatan o crecemento sostido das tecnoloxías innovadoras no tecido produtivo galego. Outro dos indicadores do grao de dixitalización das empresas galegas é a incorporación dos especialistas TIC. O 13,1% das empresas de máis de 10 empregados conta con este perfil profesional, un 4% máis no último ano, o que a converte a Galicia na novena Comunidade Autónoma con máis proporción de especialistas TIC no tecido empresarial.
