viernes, 24 de octubre de 2025
A directora xeral de Xuventude, Participación e Voluntariado, Cristina Pichel, presentou ás partes interesadas os chamados stakeholders o proxecto RuralYouthFuture no que o Goberno galego participa e que está liderado pola Fundación Galicia Europa. Esta iniciativa ten como obxectivo fomentar o emprego xuvenil entre a mocidade do rural e o desenvolvemento sostible destas zonas.
Ao encontro asistiron membros de distintos departamentos do Goberno galego e tamén da Cámara de Comercio de Santiago, da Universidade de Vigo, da Eurocidade Chaves-Verín, da Federación de Centros Xuvenís Don Bosco e da asociación Amicos, que axudarán a nutrir este proxecto con boas prácticas e coa súa experiencia e coñecementos. A reunión serviu para dar a coñecer os detalles deste proxecto que foi elixido por Interreg Europe 2021-2027 e que terá 36 meses de duración, desde o mes 1 de marzo de 2023 ata o 28 de febreiro de 2027.
RuralYouthFuture enfocarase desde seis instrumentos políticos a escala municipal, rexional e nacional para facer fronte ao reto común de responder ás necesidades da xuventude nos territorios rurais, os cales están experimentando un crecente descenso da poboación. Contará coa participación de distintos socios de sete países europeos: España, Bulgaria, Eslovenia, Lituania, Portugal, Estonia e Bélxica. O proxecto conta cun financiamento de 1,6 millóns de euros, cofinanciado con fondos FEDER.
O Centro Dramático Galego colgará de novo o cartel de entradas esgotadas nas tres últimas funcións do seu espectáculo A serie clopen esta fin de semana no Salón Teatro de Santiago de Compostela, onde terá sido visto por arredor de 5500 persoas desde a súa estrea o pasado 11 de setembro. Tras os 33 pases ofrecidos na sede da compañía da Xunta, tamén completando as butacas dispoñibles en varias ocasións, o espectáculo iniciará a finais de mes unha xira que o levará a outros cinco escenarios de Galicia e Portugal. Así, a proposta dirixida por Pablo Reboleiro representarase o 30 de outubro no Teatro Académico de Gil Vicente de Coímbra como parte da programación da Mostra Galiza Coimbra 2025, organizada polos colectivos Cena Lusófona e A Escola da Noite e que conta co apoio económico da Consellería de Cultura, Lingua e Xuventude para ofrecer unha escolma de producións escénicas galegas, entre outras moitas actividades artísticas e formativas.
As empresas galegas que empregan Intelixencia artificial son xa o 15,7%, tras experimentar un crecemento do 51,1% no último ano. Crece tamén o uso do Cloud Computing, que pasou do 31,5% ao 38,2% no mesmo período de tempo. Son datos da enquisa sobre o uso das TIC e do comercio electrónico nas empresas 2024/2025, publicada hoxe polo Instituto Nacional de Estatística (INE) e que constatan o crecemento sostido das tecnoloxías innovadoras no tecido produtivo galego. Outro dos indicadores do grao de dixitalización das empresas galegas é a incorporación dos especialistas TIC. O 13,1% das empresas de máis de 10 empregados conta con este perfil profesional, un 4% máis no último ano, o que a converte a Galicia na novena Comunidade Autónoma con máis proporción de especialistas TIC no tecido empresarial.
