sábado, 25 de octubre de 2025
O Centro Dramático Galego participa por vez primeira no Festival Internacional de Teatro Clásico de Mérida ao representar mañá e mais o mércores dúas funcións dunha das súas producións propias máis recentes: Shakespeare en Roma. A Xunta afianza así a proxección exterior da súa unidade de produción teatral, que reúne neste espectáculo as catro pezas escritas polo gran dramaturgo inglés ambientadas na época romana.
O director da compañía institucional de teatro, Fran Núñez, participou hoxe na capital estremeña na presentación das dúas funcións de Shakespeare en Roma xunto ao director do Festival de Teatro Clásico, Jesús Cimarro, e diferentes membros do equipo da montaxe: Quico Cadaval, director da parte centrada no texto Tito Andrónico; Sara Rey, responsable da dirección de Antonio e Cleopatra, e os intérpretes Rebeca Montero e Toni Salgado que representaron o elenco do que tamén forman parte Xurxo Cortázar, Sheyla Fariña, Keka Losada, Marcos Orsi, Fran Peleteiro e Santi Romay.
O Teatro Romano acollerá ás 22,45 horas tanto a representación prevista para mañá martes como a do mércores dentro do programa do prestixioso encontro escénico, para a que se realizaron ensaios específicos de adaptación ao singular espazo escénico. Co desembarco de Shakespeare en Roma no Festival Internacional de Teatro Clásico de Mérida, a Consellería de Cultura, Educación, FP e Universidades amplía as vías de colaboración e intercambio con entidades e estruturas teatrais doutros territorios a través do Centro Dramático Galego.
De Istambul a Almagro
A esta participación no Festival de Mérida, cómpre unirlle a presenza da unidade de produción teatral da Xunta noutros encontros internacionais como o Maltepe en Istambul, o do Alentejo en Portugal ou o de Almagro en 2021 e 2022, ano no que Galicia foi a comunidade convidada e participou a través das coproducións Arte sen guión, La Toffanna e A barca do inferno.
Nesta mesma liña, súmase a implicación en proxectos europeos como Phōnē, iniciativa na que participan entidades escénicas de Irlanda, Francia, Italia, Romanía, Alemaña, Noruega e os Países Baixos e marco do que sairá a vindeira produción do Centro Dramático Galego. Este espectáculo, co que a unidade teatral da Xunta conmemorará en 2024 o seu 40 aniversario, estará dirixida por Tamara Canosa e reunirá en escena os 20 intérpretes que resultarán do proceso de selección en curso.
Con 47 personaxes
O elenco de Shakespeare en Roma dálles vida ao longo da montaxe a 47 personaxes baixo a dirección de catro equipos de dirección que se encargan de cadansúa peza. Así, aos xa citados Quico Cadaval e Sara Rey, súmanselles Xúlio Lago e María Barcala, que se encargan do Xulio César asinado por Ana Carreira, e Rui Madeira, quen leva a escena a versión condensada de Coriolano polo autor ucraíno Volodymyr Snegurchenko. A tradución ao castelán para as representacións en Mérida asínaa Rosa Moledo.
A nómina artística de Shakespeare en Roma complétase con Ana Abad de Larriva e Lorena Conde nas adaptacións de Antonio e Cleopatra e Tito Andrónico, respectivamente; Xosé Lois Romero, á fronte do espazo sonoro; Juanjo Amado, na iluminación e Saturna, no deseño de vestiario.
O Centro Dramático Galego colgará de novo o cartel de entradas esgotadas nas tres últimas funcións do seu espectáculo A serie clopen esta fin de semana no Salón Teatro de Santiago de Compostela, onde terá sido visto por arredor de 5500 persoas desde a súa estrea o pasado 11 de setembro. Tras os 33 pases ofrecidos na sede da compañía da Xunta, tamén completando as butacas dispoñibles en varias ocasións, o espectáculo iniciará a finais de mes unha xira que o levará a outros cinco escenarios de Galicia e Portugal. Así, a proposta dirixida por Pablo Reboleiro representarase o 30 de outubro no Teatro Académico de Gil Vicente de Coímbra como parte da programación da Mostra Galiza Coimbra 2025, organizada polos colectivos Cena Lusófona e A Escola da Noite e que conta co apoio económico da Consellería de Cultura, Lingua e Xuventude para ofrecer unha escolma de producións escénicas galegas, entre outras moitas actividades artísticas e formativas.
As empresas galegas que empregan Intelixencia artificial son xa o 15,7%, tras experimentar un crecemento do 51,1% no último ano. Crece tamén o uso do Cloud Computing, que pasou do 31,5% ao 38,2% no mesmo período de tempo. Son datos da enquisa sobre o uso das TIC e do comercio electrónico nas empresas 2024/2025, publicada hoxe polo Instituto Nacional de Estatística (INE) e que constatan o crecemento sostido das tecnoloxías innovadoras no tecido produtivo galego. Outro dos indicadores do grao de dixitalización das empresas galegas é a incorporación dos especialistas TIC. O 13,1% das empresas de máis de 10 empregados conta con este perfil profesional, un 4% máis no último ano, o que a converte a Galicia na novena Comunidade Autónoma con máis proporción de especialistas TIC no tecido empresarial.
