viernes, 18 de septiembre de 2026
Na súa intervención o presidente da Xunta salientou que este proxecto conxunto reforza a colaboración entre a Xunta e a educación superior, ao tempo que garante o estado óptimo dos edificios, aulas ou laboratorios dos campus. É o noso deber como Administración garantir que a universidade pública conte coas mellores infraestruturas e que estas actúen como verdadeiros motores de aprendizaxe, investigación e desenvolvemento persoal, destacou.
A este respecto, o Goberno autonómico destinará 40 M 10 millóns cada ano á mellora de espazos nos sete campus que existen na comunidade, sendo as propias universidades as que seleccionaron estas infraestruturas. En declaracións aos medios de comunicación tras o acto, o presidente da Xunta detallou que dos 100 millóns de euros do plan, 60 millóns "son achegados polas propias universidades con cargo ao financiamento ordinario" que reciben por parte do Goberno galego ao amparo do Plan de Financiamento Plurianual 2021-2026. O plan presentado este venres, pola súa banda, contempla fondos a maiores, é dicir, que a Xunta habilita outros 40 millóns -cos que se acadan os 100 en total-. Trátase, como recalcou o presidente, dun financiamento extraordinario, a maiores" que "non teñen outras comunidades autónomas" e neste sentido destacou que as tres universidades públicas galegas foron capaces "de poñerse de acordo en distribuirse esa cantidade".
Tres actuacións primordiais na UVigo
Na Universidade de Vigo serán obxecto de actuación o edificio para Enxeñaría Aeroespacial, no campus de Ourense; a rehabilitación dun dos edificios da ETEA, e a remodelación do Hospital provincial no campus de Pontevedra, actuación que consistiría na realización do estudo funcional de necesidades da Universidade para adaptarse a este edificio.
No caso de Ourense, a UVigo ten xa convocado o concurso de ideas para o deseño do novo edificio para a Escola de Enxeñaría Aeronáutica do Espazo, que actualmente está repartida en diferentes edificios do campus. Este inmoble permitirá posteriormente acometer unha "reformulación" a nivel urbanístico para que as dúas zonas do campus, que están agora separadas, poidan "ter un acceso máis directo", en palabras do reitor, Manuel Reigosa.
En Vigo, as actuacións estarán encamiñadas a que o Centro de Investigación Mariña, CIM, e a Facultade de Ciencias do Mar se trasladen aos terreos da ETEA, onde se localizará tamén o Centro Superior de Investigacións Científicas (CSIC).
Finalmente, no caso de Pontevedra, o reitor explicou que o novo Grao en Deseño arrancará o vindeiro curso no edificio de Benito Corbal, pero sinalou que, se ben esta localización permitirá que se inicie a impartir a titulación, non será así coa súa finalización. A isto engadiu o feito de que o de Pontevedra é o único campus que non conta cunha residencia universitaria, para o que se recorrerá a unha remodelación de espazos no actual Hospital Provincial.
Tivo lugar o acto de entrega dos Premios de Responsabilidade Social Empresarial de Galicia 2026, que puxeron en valor a importancia de promover unha cultura empresarial que integre a responsabilidade social no seu modelo de xestión e sitúe as persoas no centro da actividade. As entidades premiadas foron Galaica Consultaría Integral e Nasas Social Media, na categoría de pequena empresa; Torres y Sáez, na de mediana empresa; Citanias Obras y Servicios, na de grande empresa; e Altia, coa Mención á Conciliación.
A conselleira do Mar, Marta Villaverde, defenderá ante o Goberno central a posición de Galicia sobre o futuro da Política Pesqueira Común, baseada na necesidade de garantir financiamento suficiente para o sector, facilitar a renovación e modernización da frota e avanzar cara a un modelo de xestión que teña en conta tanto a conservación dos recursos como a viabilidade económica e social da actividade. Villaverde trasladará que Galicia afronta este debate desde unha posición singular pola dimensión e diversidade do seu complexo mar-industria, cunha extensa frota de baixura e pequena escala, unha importante presenza da altura e gran altura, unha industria transformadora e conserveira de referencia e unha acuicultura cun destacado peso na produción comunitaria.
