domingo, 8 de noviembre de 2026
Na xuntanza, na que participaron o director técnico e catedrático de Física da USC, Luis Miguel Varela; o vicerreitor de Planificación e Sostibilidade e a directora do Cintecx da UVigo, José Luis Míguez e Concepción Paz, respectivamente; e o director científico do Centro de Investigacións Tecnolóxicas da UDC, Armando Yáñez, analizáronse as capacidades e necesidades do sistema universitario de investigación en hidróxeno en Galicia, así como a posibilidade de crear unha cátedra interuniversitaria.
Con esta iniciativa, preténdese aliñar as capacidades investigadoras do SUG relacionadas có hidróxeno en torno a liñas prioritarias nun mapa completo, tendo en conta aos centros tecnolóxicos e o tecido produtivo da contorna, explica a directora do Cintecx, que sinala que, deste xeito, evitaranse duplicidades, identificarase equipamento e infraestruturas necesarias e promoverase un uso eficiente dos recursos, de maneira que se cimente a base dun I+D+i entorno ao hidróxeno verde en Galicia. Pola súa banda, o director técnico da AGH2, Luis Miguel Varela, a reunión marca un novo escenario cun novo enfoque no campo da investigación, neste caso do hidróxeno verde. O acordo de colaboración entre os e as investigadoras do Sistema Universitario de Galicia leva un compromiso de país, un referente neste campo, que asenta as bases para planificar, de maneira coordinada, a investigación sobre o H2, apunta Varela.
Representando á AGH2, ademais do seu director técnico, tamén participou na reunión o vicepresidente da entidade, Luis Moreno. Por parte da UVigo asistiron á xuntanza, ademais do vicerreitor de Planificación e da directora do Cintecx, os docentes e investigadores Jacobo Porteiro e María Ángeles Sanroman. Como representantes da USC, ademais do catedrático de Física, Luis Miguel Varela, tamén participou o director de Promoción y Estratexia Científica da USC, Emilio Martínez, mentres que o director da ETS de Náutica e Máquinas, Manuel Romero e, de maneira telemática, o director do Departamento de Física e Ciencias da Terra e catedrático, Óscar Cabeza, completaron a representación da UDC na xuntanza celebrada no campus vigués.
Análise de capacidades e cátedra interuniversitaria
Na primeira reunión das tres institucións e a AGH2, realizouse unha análise preliminar de capacidades e necesidades no sistema universitario de investigación en H2 en Galicia, para o que se acordou realizar consultas internas e presentar as conclusións na próxima xornada de traballo. O obxectivo é que cada institución analice as súas capacidades técnicas, de equipos, de persoal e de liñas de investigación, para posteriormente fixar cales serán as prioritarias a desenvolver, explica o director técnico da AGH2. Na xuntanza celebradas no campus vigués tamén se expuxo a necesidade de crear unha cátedra interuniversitaria de hidróxeno, para a que se buscarán diferentes liñas de financiamento, e coa que se pretende unir os sectores público, privado, social e científico e impulsar de maneira conxunta a especialización de Galicia e os seus profesionais no sector do hidróxeno verde e toda a súa cadea de valor.
A próxima reunión celebrarase previsiblemente na UDC, durante a primeira semana de maio, onde se poñerá en común a situación de cada centro e acordaranse as liñas de investigación prioritarias. Posteriormente, levarase a cabo un proceso similar cos centros tecnolóxicos de Galicia, para finalmente establecer un mapa de investigación de H2 verde na comunidade e investigar de xeito coordinado e consensuado, as diferentes dimensións do vector enerxético, que será clave na transición ecolóxica.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
