martes, 28 de octubre de 2025
O secretario xeral de Cultura, Anxo M. Lorenzo, presentará as intervencións o vindeiro mércores 11 no Museo de Belas Artes a partir das 19,30 horas, con entrada de balde.
Natural de Bos Aires, Jorge Lavelli chegou a París en 1960 e destacou axiña pola posta en escena de espectáculos experimentais e de investigación. En 1964 dirixiu por primeira vez a María Casares en Divinas palabras de Valle-Inclán en Bos Aires e converteuse no director fetiche da actriz. Consolidado como un dos máis importantes directores teatrais de Francia, tamén deixou pegada noutros países europeos e latinoamericanos. Un dos fitos máis salientables da súa prolífica traxectoria é a fundación do novo Théâtre National de la Colline en 1987, que dirixiu ata 1996 e que dedicou á dramaturxia e á creación contemporáneas.
Na carreira de Lavelli abundan os premios e distincións, entre os que destacan os concedidos por Francia, como Cabaleiro e Oficial da Orde Nacional do Mérito, Comendador da Orde das Artes e das Letras, Cabaleiro da Lexión de Honra e o Gran Premio das Artes da Escena da Cidade de París polo conxunto da súa obra. A conferencia que ofrecerá o mércores na Coruña leva por título María extraordinaria, excepcional, inesquecible, artista e amiga entrañable.
Pola súa banda, Josep María Flotats ofrecerá o relatorio María Casares: vontade e forza. Formado na Escola Superior de Arte Dramática de Estrasburgo, residiu en París onde desenvolveu un intenso labor teatral e ingresou na Comédie Française, da que é societaire desde 1982. Tras o seu regreso a Barcelona fundou a Companyia Flotats e o Teatre Nacional de Cataluña, do que foi o primeiro director. Xa en 1998 creou unha produtora en Madrid actualmente coñecida como Taller 75.
O seu labor foi recoñecido por diversos premios, como o Gérard-Philipe, o da Crítica Francesa, o Premio Nacional de Teatro ou o Premio Nacional de Interpretación da Generalitat de Catalunya. Tamén recibiu condecoracións, como as de Cabaleiro e Oficial da Lexión de Honra, Oficial da Orde das Artes Letras, a Cruz de Sant Jordi ou a Medalla de Ouro ao Mérito ás Belas Artes.
Conferencias ao longo do ano
O ciclo María Casares. Do exilio ao escenario prolóngase ata finais de ano en seis xornadas cunha ducia de intervencións protagonizadas por personalidades relevantes do mundo das artes e da cultura que coñeceron desde a proximidade o traballo e o legado da artista homenaxeada. Tras a cita de maio, as sesións retómanse xa en setembro, con Tina Sainz e José Luís Méndez Romeu. En outubro será a quenda de María Lopo e Pedro Soler. O peche porano en novembro Borja Ortiz de Gondra e María Delgado.
A iniciativa enmárcase na programación do centenario de María Casares promovida pola Xunta, que ofrece tamén desde hai un mes, na biblioteca Miguel González Garcés, a exposición María Casares, residente privilexiada. A mostra expón 200 fondos propios do centro bibliotecario, con fotografías, filmes, documentos e publicacións, nas que destacan os volumes da colección persoal de Santiago Casares Quiroga. Permanecerá ata finais de ano para achegarlle á cidadanía un percorrido pola vida e contorna familiar da actriz.
Xunto a estas propostas, a programación prevista pola Xunta ofrecerá durante todo o ano actividades tanto en Galicia como fóra, a través de propostas dixitais, editoriais, escénicas e audiovisuais que percorrerán toda a súa pegada histórica desde diferentes plataformas e linguaxes. Xunto ao Goberno galego participan numerosas entidades e institucións de distintos territorios, como a Biblioteca Nacional de España, a Embaixada de España en Francia, o Instituto Cervantes, a Asociación de Actores e Actrices de Galicia, Edicións Xerais, a Corporación Radio e Televisión de Galicia (CRTVG), entre outras.
O Centro Dramático Galego colgará de novo o cartel de entradas esgotadas nas tres últimas funcións do seu espectáculo A serie clopen esta fin de semana no Salón Teatro de Santiago de Compostela, onde terá sido visto por arredor de 5500 persoas desde a súa estrea o pasado 11 de setembro. Tras os 33 pases ofrecidos na sede da compañía da Xunta, tamén completando as butacas dispoñibles en varias ocasións, o espectáculo iniciará a finais de mes unha xira que o levará a outros cinco escenarios de Galicia e Portugal. Así, a proposta dirixida por Pablo Reboleiro representarase o 30 de outubro no Teatro Académico de Gil Vicente de Coímbra como parte da programación da Mostra Galiza Coimbra 2025, organizada polos colectivos Cena Lusófona e A Escola da Noite e que conta co apoio económico da Consellería de Cultura, Lingua e Xuventude para ofrecer unha escolma de producións escénicas galegas, entre outras moitas actividades artísticas e formativas.
As empresas galegas que empregan Intelixencia artificial son xa o 15,7%, tras experimentar un crecemento do 51,1% no último ano. Crece tamén o uso do Cloud Computing, que pasou do 31,5% ao 38,2% no mesmo período de tempo. Son datos da enquisa sobre o uso das TIC e do comercio electrónico nas empresas 2024/2025, publicada hoxe polo Instituto Nacional de Estatística (INE) e que constatan o crecemento sostido das tecnoloxías innovadoras no tecido produtivo galego. Outro dos indicadores do grao de dixitalización das empresas galegas é a incorporación dos especialistas TIC. O 13,1% das empresas de máis de 10 empregados conta con este perfil profesional, un 4% máis no último ano, o que a converte a Galicia na novena Comunidade Autónoma con máis proporción de especialistas TIC no tecido empresarial.
