viernes, 14 de agosto de 2026
O secretario xeral de Política Lingüística, Valentín García, participou hoxe na presentación da xa tradicional xira que a Xunta de Galicia, Bolanda Edicións, Gadis e TVG preparan cada ano e que levará este Nadal á familia Bolechas polos concellos de Santa Comba, Vimianzo, Abadín, Verín, Viana do Bolo, Negreira, Trazo e As Pontes de García Rodríguez.
Na presentación da xira, o representante da Consellería de Cultura, Educación e Universidade mostrou a súa satisfacción polo feito de que, un ano máis, os Bolechas celebren connosco o Nadal, levándolles aventuras e ilusión en lingua galega a nenos e nenas das catro provincias.
Canda o representante autonómico tamén participaron neste acto no Pazo de San Roque, Jaime Arias, director de Proxección Social da TVG; Román Roo, delegado de Gadis en Santiago, e Antonio Couto, responsable de Bolanda Edicións. A presentación contou, ademais, coa presenza dos actores e dos propios Bolechas.
Os Bolechas e o crebanoces de Nadal
Este Nadal, os Bolechas están a preparar unha carta a Papá Noel, pero a cousa complícase e deciden seguir o labor comendo noces, que así pensan mellor. Mais as noces teñen a casca moi dura e escachan os dentes. Entón, os irmáns collen un crebanoces na cociña, pero trillan os dedos. De súpeto, alguén chama á porta e aparece un enorme crebanoces de Nadal chegado directamente de Alemaña para axudalos, mais ao pouco de empezar, o convidado fica inmóbil. Tras unha chamada ao 112, os Bolechas descobren que o crebanoces non é humano, senón un boneco de corda e, ademais, non teñen a chave para volver activalo. Poderán os Bolechas recuperar o seu crebanoces de Nadal?
Para descubrir como acaba o misterio que se lle presenta á familia Bolechas este Nadal, os interesados poderán visitar algunha das paradas da xira deste espectáculo de monicreques manipulados. A primeira parada será o vindeiro sábado 18 no concello de Santa Comba (no auditorio do Edificio Multiúsos, ás 18,00 horas). O tour seguirá o domingo 19 en Vimianzo (Auditorio Municipal, ás 18,30 horas), o xoves 23 en Abadín (ás 16,30 horas no salón de actos da Casa do Concello), o domingo 26 en Verín (no Auditorio Municipal, ás 18,00 horas), o mércores 29 en Viana do Bolo (na Casa da Cultura, ás 18,00 horas), o xoves 30 en Negreira (ás 18,00 horas no Auditorio Centro Sociocultural), o domingo 2 de xaneiro en Trazo (no Centro Social Polivalente, ás 17,00 horas) e o martes 4 nas Pontes de García Rodríguez (no Auditorio Municipal Cine Alovi, ás 18,00 horas).
En todas as localidades, as entradas son de balde ata encher a cabida. Toda a información e calendario están dispoñibles no Portal da Lingua Galega e na Axenda de Cultura de Galicia.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
