viernes, 21 de agosto de 2026
O convenio asinado hoxe na Reitoría, que terá unha vixencia inicial de dez anos prorrogables, concreta a cesión da nave número 14 (garaxe) da Cidade das TIC para a instalación deste Centro de Excelencia Internacional, Galaxy-lab, destinado á experimentación con drons no ámbito do transporte de pasaxeiros e mercadorías en zonas urbanas, así como para demostración e proba de produtos para empresas.
A Universidade da Coruña aportará ademais a este proxecto o seu coñecemento e investigación punteira en Intelixencia Artificial, realizada no Centro de Investigación TIC (CITIC), o maior centro de investigación en Intelixencia Artificial de Galicia.
Será por conta de ITG a realización das obras, adquisición de infraestruturas así como o mantemento e conservación do edificio cedido. O Instituto Tecnológico de Galicia asinou a principios deste mes un convenio de colaboración coa Xunta de Galicia mediante o cal o Goberno galego achegará algo máis da metade do investimento previsto para a posta en marcha do proxecto Galaxy-lab, con preto de 580.000 euros dos 1,16 millóns de euros de custe total. Este orzamento permitirá o desenvolvemento dunha rede de seguridade, adquisición de equipamento específico e licenzas necesarias para realizar as probas de experimentación.
O proxecto Galaxy-lab permitirá reforzar a fortaleza competitiva do Polo Aeroespacial de Galicia e avanzar no despregamento do sistema de xestión do tráfico aéreo non tripulado deseñado pola UE, axustar os sistemas de xeoposicionamento e coordinar un espazo aéreo controlado real. Tanto o reitor, Julio Abalde, como o director do ITG, Carlos Calvo, coincidiron en sinalar que este laboratorio forma parte da estratexia da Xunta de Galicia referente aos avións non tripulados.
Cidade das TIC
A UDC está a impulsar a Cidade das TIC como un proxecto estratéxico, onde pretende crear ecosistema TIC dinámico e vangardista que combine múltiples aspectos, espazos, infraestruturas, centros e servizos, impulsando para ese fin un polo tecnolóxico TIC de innovación dixital de referencia a nivel estatal e internacional, que actúe como demostrador de tecnoloxías emerxentes, de apoio ao tecido empresarial pola prestación de servizos tecnolóxicos avanzados non dispoñibles en Galicia, que facilite a instalación de empresas do sector e que sirva como vector de crecemento e dinamización económica grazas á creación de startups, o impulso da I+D+i, o fomento do emprendemento e a atracción de empresas multinacionais.
Instituto Tecnológico de Galicia
ITG é Centro Tecnolóxico Nacional recoñecido oficialmente polo Ministerio de Economía e Competitividade. Ten como obxectivo mellorar a capacidade competitiva das empresas, organizacións e profesionais a través da I+D, a tecnoloxía, a innovación e a prestación de servizos profesionais avanzados. ITG alcanzou as maiores cotas de excelencia recoñecidas polo Estado español no marco da investigación e o desenvolvemento dun ecosistema tecnolóxico que permitirá o despregamento de carácter profesional e social do uso de Sistemas Aéreos Non Tripulados (Unmanned Aircraft Systems, UAS). Así mesmo, ITG constituíuse nun dos axentes relevantes en Europa para a investigación e o desenvolvemento de UAM (Urban Air Mobilty), grazas á súa contribución ao desenvolvemento de estándares internacionais e a obtención de métricas para a aceptación social da UAM.
Cátedra ITG-CITIC en Tecnoloxías de Aeronaves non Tripuladas
O reitor, Julio Abalde, e o director Xeral de ITG, Carlos Calvo, asinaron o pasado mes de xullo o convenio de creación da Cátedra ITG-CITIC en Tecnoloxías de Aeronaves non Tripuladas. Mediante esta Cátedra ITG e o Centro de Investigación en Tecnoloxías da Información e Comunicacións (CITIC) colaborarán en proxectos de investigación en tecnoloxías relacionadas coas aeronaves non tripuladas (UAS). Ademais traballarán noutros aspectos como a xeración de prácticas curriculares de alumnado da UDC na empresa.
O profesor Marcos Ortega dirixe esta Cátedra. Ortega é profesor Titular de universidade da área de Ciencia da Computación e Intelixencia Artificial da UDC.
Galicia vén de acadar os 43.000 beneficiarios do Bono Coidado no Fogar e consolídase como referente na atención á dependencia en España. Esta medida pioneira, posta en marcha pola Xunta hai dous anos e única no conxunto do país, permite que as persoas dependentes poidan recibir coidados no seu fogar e forma parte do compromiso da Xunta coa atención á dependencia. Neste sentido, o Executivo autonómico destinou este ano 179 millóns de euros para esta prestación. O Bono Coidado no Fogar consiste nunha axuda de 5.000 euros ao ano para os dependentes que son coidados nos seus domicilios por un familiar ou calquera outra persoa da súa contorna.
O sistema educativo galego contará con 536 centros plurilingües o próximo curso 2026/27 nas etapas de Infantil, Primaria, ESO ou Bacharelato e FP. Seis centros decidiron incorporarse a esta iniciativa e outros dous ampliar a súa participación na mesma a outras etapas, o que confirma o incremento progresivo deste modelo, voluntario para os centros, desde a súa posta en marcha. Do total dos centros con modelo plurilingüe, 445 serano en Primaria e 93 en ESO, 259 en Infantil, 16 centros en Bacharelato e 40 en FP. Ademais dos centros plurilingües, a Consellería oferta diversas modalidades.
