sábado, 17 de octubre de 2026
A Xunta de Galicia e Afundación levan á Coruña do 29 de xuño ao 28 de agosto As miradas de Isaac, exposición coa que se procura difundir a figura de Díaz Pardo e que durante os seis meses de exhibición na Cidade da Cultura en Santiago de Compostela do 26 de novembro ao 30 de maio de 2021 foi visitada por máis de 26.000 persoas.
As miradas de Isaac foi a primeira grande exposición da Xunta de Galicia en homenaxe a Díaz Pardo despois do seu falecemento, en xaneiro de 2012. Inaugurouse en novembro de 2020 no Museo Centro Gaiás da Cidade da Cultura para facela coincidir co centenario do seu nacemento (1920) e co obxecto de pór en valor o legado e as aportacións á cultura galega do impulsor da recuperación da fábrica de cerámica de Sargadelos, do Laboratorio de formas, do Seminario de Estudos Galegos, do Instituto Galego da Información, de Ediciós do Castro ou do Museo Galego de Arte Contemporánea Carlos Maside, entre outros moitos proxectos relevantes.
O secretario xeral de Cultura da Xunta, Anxo M. Lorenzo, e o directorxerente de Afundación, Pedro Otero Espinar, deron a coñecer hoxe esta colaboración para iniciar na Coruña o programa de itinerancias de As miradas de Isaac, nun acto ao que tamén asistiron os comisarios da mostra e fillos de Díaz Pardo, Xosé e Camilo Díaz Arias de Castro.
Anxo M. Lorenzo destacou que con esta exposición a Xunta avanza no seu obxectivo de achegar a toda a cidadanía galega contidos producidos na Cidade da Cultura, impulsando un plan de itinerancias das súas exposicións e traballando para que o Gaiás opere como unha factoría de proxectos culturais que circulen por outros espazos da Comunidade.
Pola súa banda, o director xerente de Afundación, salientou que con esta mostra transcéndese o mero feito expositivo, dada a diversidade e multitude de elementos amosados e o carácter itinerante da iniciativa nas sedes de Afundación. Díaz Pardo é un símbolo de quen tivemos o privilexio de aprender na nosa entidade en mostras e publicacións que nos enriqueceron a cada paso. Para nós é un privilexio de acollermos nas nosas sedes As miradas de Isaac e contribuírmos, coa nosa participación neste proxecto, á difusión do coñecemento dunha figura esencial para o noso patrimonio cultural, enfatizou.
Dez seccións, 500 pezas e unha videocreación
As miradas de Isaac contará na Coruña cunhas 500 pezas entre obras de arte, murais, cerámicas, carteis, publicacións e obxectos persoais coa pretensión de reflectir a inesgotable creatividade de Díaz Pardo, un personaxe imprescindible da cultura galega do século pasado.
A mostra mantén a estrutura en dez seccións, a través das que afonda en todo o seu periplo vital e profesional. Así na exposición na Coruña quedará reflectida a importancia do pai Camilo Díaz Baliño no desenvolvemento da súa personalidade; a infancia e mocidade en Compostela; e a faciana de pintor, que deixou unha profunda pegada en todas as súas realizacións.
Do mesmo xeito, a mostra tamén se centra no contacto de Díaz Pardo co exilio e o seu compromiso pola recuperación da memoria histórica; o labor como escritor; as iniciativas empresariais, con Sargadelos como insignia; e as iniciativas culturais e investigadoras, entre as que cabe destacar o Laboratorio de Formas ou o Instituto de Galego de Información. O relato expositivo non esquece o deseñador industrial que proxectou máquinas, porcelanas, mobles ou Ediciós do Castro; o editor imparable; e finalmente enxalza o recuperador con Luis Seoane da vangarda artística galega anterior á Guerra Civil, coa posta en marcha do Museo Galego de Arte Contemporánea Carlos Maside.
A exposición na Coruña tamén incorpora como elemento vertebrador a videoinstalación realizada pola neta de Isaac Díaz Pardo, a fotógrafa e xornalista cultural Cecilia Díaz Betz. Esta peza audiovisual, realizada en colaboración co realizador Jordi Cussó, está creada a partir de materiais de arquivo, na que se propón un encontro co intelectual e artista, sendo el mesmo quen nos relata en primeira persoa a súa vida e obra. Unha forma radicalmente diferente de reivindicar e lembrar a súa figura, máis acorde coa súa propia visión vangardista, e coa se procura revivir o seu universo e o seu espírito sempre aberto, tanxencial e polifacético.
En Vigo despois do verán
A exposición poderá visitarse na sede Afundación de A Coruña do 29 de xuño ao 28 de agosto, con entrada de balde, de luns a sábado (festivos incluídos) de 12,00 a 14,00 horas e de 17,00 a 20,30 horas. Tras a súa clausura, a colaboración entre a Xunta e a Afundación permitirá que o programa de itinerancias de As miradas de Isaac continúe en Vigo despois do verán.
O xurado dos Premios da Cultura Galega 2026 reuniuse hoxe en Santiago de Compostela para outorgar os recoñecementos desta edición. A xuntanza, que tivo lugar na Cidade da Cultura de Galicia, estivo presidida polo conselleiro de Cultura, Lingua e Xuventude, José López Campos. Ao remate do acto, fíxose público o fallo nas distintas categorías propostas, resultando galardoados María Solar, en Letras; Almudena Fernández Fariña, en Artes Visuais; a compañía Elefante Elegante, en Artes Escénicas; a Asociación Galega de Empresas Musicais, en Música; Alfonso Zarauza, na categoría Audiovisual; Espazo Lectura, en Lingua; o Obradoiro de Gaitas Seivane, en Patrimonio Cultural; e o Festival EmigraSON, en Proxección Exterior.
O obxectivo desta rede de recursos é acompañar ás persoas con discapacidade ao longo da súa vida, desde os primeiros anos ata que se fan maiores, ofrecendo respostas axeitadas a cada etapa e a cada necesidade. Desde o ano 2016, o número de unidades de atención temperá aumentou ata as 57. Estes servizos públicos e gratuítos dirixidos a nenas e nenos de 0 a 6 anos de idade son fundamentais para detectar, previr e actuar ante trastornos de desenvolvemento. A Rede galega de atención temperá na actualidade chega a máis de 200 concellos e a 6.000 familias.
