viernes, 6 de noviembre de 2026
A directora da Axencia Galega de Innovación (Gain), Patricia Argerey, asistiu esta mañá en Madrid á presentación do Anuario 2021 da Fundación Cotec, un evento que este ano se centrou no labor dos profesionais da innovación que durante os últimos meses puxeron o seu talento ao servicio da loita contra o coronavirus.
No marco do acto déronse a coñecer os datos recollidos polo Observatorio no seu informe anual, do que se desprende que Galicia é unha das oito comunidades españolas que superaron en 2019 os niveis de investimento en I+D previos á crise e unha das nove que conta tamén con máis persoal neste eido en comparación con ese período. No Mapa de talento, Galicia avanza tres posicións ata situarse novena.
A Comunidade progresa, por tanto, no seu obxectivo de avanzar tanto na I+D como na innovación co obxectivo de seguir afondando nun modelo económico baseado no coñecemento, máis resiliente e que promova sectores tecnolóxicos e especializados, axudando á vez, a evolucionar ao conxunto de sectores cara a unha economía máis innovadora. Un compromiso que se reflicte no orzamento deste ano que destina a este tipo de actuacións 227,5 millóns de euros, un 60% máis que en 2009.
A directora estivo no mostrador da empresa galega Bionix coa que Gain asinou un convenio por importe de preto de 140.000 euros para desenvolver un respirador de baixo custo e industrializable en Galicia que atenda as necesidades de ventilación mecánica xurdidas coa crise sanitaria da covid-19. No mes de febreiro o respirador Freesterra de Bionix recibiu a autorización da Axencia Española do Medicamento para o ensaio clínico con humanos polo que é un produto que se atopa preto de conseguir a súa comercialización.
O convenio enmárcase na chamada realizada o pasado ano por Gain para identificar capacidades e outorgar axudas a proxectos innovadores que puideran ser transferibles ao ámbito da saúde e da industria na loita contra o coronavirus a través da que se apoiaron un total de oito iniciativas, entre elas a da coruñesa Bionix.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
