viernes, 27 de junio de 2025
No acto de presentación participou director da Axencia Galega de Industrias Culturais (Agadic), Jacobo Sutil, para deixar testemuño do apoio da Xunta de Galicia a este evento como o principal encontro galego especializado na súa temática. Neste sentido, destacou que a MICE vai un paso máis alá do cine documental, o que incide na visualización da relación humana cos territorios, coas costumes e coa idiosincrasia de cada pobo. Se o cinema galego, en xeral, cobra todo o sentido cando fala de nós mesmos, o cinema etnográfico galego, do que hai boas mostras nesta carteleira, achegan claramente ese plus diferencial que nos sitúa como un sistema audiovisual propio no panorama global, expresou.
Financiamento da Xunta
Tamén lembrou que a MICE do pasado 2020 foi unha das primeiras actividades que tiveron que ser suspendidas por mor da pandemia, pero que grazas á capacidade de adaptación e resistencia das nosas estruturas culturais, conseguiu reiventarse para se levar a cabo no mes de agosto cun formato mixto (en liña e presencial) e non perder o contacto nin cos profesionais nin co público.
Sinalou, ademais, que a esta continuidade contribuíu o Plan de reactivación cultural posto en marcha polo Goberno galego que, entre outras medidas, reformulou as subvencións aos festivais audiovisuais para favorecer a súa celebración no novo contexto sanitario. Esta mesma convocatoria de axudas, dotada este ano con 200.000 euros, atópase nestes momentos en trámite de resolución para cofinanciar os principais eventos audiovisuais de 2021.
Desde tres espazos
A programación da Sección Oficial da 16ª MICE poderá seguirse desde as pantallas do Museo do Pobo Galego, do Teatro Principal e do Cinema Númax. Serán 11 películas de sete países (España, Estados Unidos, Francia, Finlandia, Marrocos, Mozambique e Portugal) as que irán a concurso, entre as que se atopan catro filmes galegos: A miña terra, de Santiago D. Risco; Notas sobre a habilitade en A Barca, do Colectivo Semente; A poeta analfabeta, de Sonia Méndez e Entre pastores e lobos, de Manuel Pedrosa.
Fóra de competición proxectaranse o documental Negro Púrpura, de Adriana P. Villanueva e Sabela Iglesias, que abrirá a MICE coa súa preestrea o 6 de abril, ou títulos como Os corpos de Eloy Domínguez Serén, e a mediometraxe Do Not Lean On Door, de Vicente Vázquez.
Entre as actividades paralelas destacan o obradoiro práctico Da investigación á creación biográfica e a exposición Ons soa, comisariada pola arqueóloga e etnógrafa Paula Bellesteros-Arias a partir do seu traballo de campo na illa de Ons. Esta mostra, que recolle 19 fotografías e outros documentos audiovisuais, quedou inaugurada hoxe no Museo do Pobo Galego, onde se poderá visitar ata o 30 de maio. Como parte desta iniciativa está programada para o 25 de marzo a proxección da película Ons, de Alfonso Zarauza, xunto cunha conversa en liña na que participará Roberto Castiñeira, garda forestal do Parque Nacional das Illas Atlánticas.
Nun momento de auxe das intelixencias artificiais xerativas, 'Castelao. Mirar por Galicia' aposta polo emprego destas tecnoloxías para achegar a nosa historia e a nosa cultura a todo tipo de públicos, aproveitando todo o potencial das novas linguaxes, pero tamén facéndoo dun xeito ético e responsable, sen deixar de lado o necesario traballo de autor. O estudio compostelán Maxina é responsable do deseño conceptual, animación e deseño desta experiencia, baixo a dirección artística de Carlos Seijo, mais son numerosas as empresas galegas que forman parte deste proxecto, entre as que se atopa o Laboratorio Numax, ao cargo do deseño gráfico en sala; a produtora audiovisual Miramemira, responsable dos audiovisuais; MADA producións, que se ocupou da accesibilidade; Daexga, que se encargou do transporte e montaxe, e Vifer, de cuxa autoría é a instalación de gráfica.
Música, territorio e natureza son os eixos fundamentais do Fisterra Experience, unha singular cita musical que regresa esta fin de semana á vila mariñeira de Fisterra co apoio dos Concertos do Xacobeo para celebrar a súa segunda edición os días 27, 28 e 29 de xuño. Fisterra Experience busca achegarse á arte dun modo cercano, ofrecendo experiencias únicas e inspiradoras. O festival explora as posibilidades que ofrecen o territorio e a natureza de Fisterra, desde unha ollada sostible e comunitaria. Entre as bandas e artistas destacados do seu cartel, danse cita nomes como Baiuca, Mondra, Helena Egea, Sabela & The Heartbreakers, A Pedreira e Andhrea & The Blacks Cats, entre moitos outros. Deste modo, o Fisterra Experience renace neste 2025 para ofrecer unha experiencia musical cualitativa que vai da electrónica ao soul, do pop ao jazz e a nova música tradicional, entre outros sons, nunha contorna única.
