martes, 22 de septiembre de 2026
Os Foros #aculturasegue consisten nunha serie de encontros online en formato webinario con especialistas procedentes de distintos campos das industrias creativas. Propóñense convidar á reflexión e á análise dos retos aos que se enfronta o sector no contexto actual de emerxencia sanitaria, e das implicacións que as medidas de contención da COVID-19 están a ter para as empresas e profesionais da cultura.
A súa primeira entrega celebrada a pasada semana e centrada nos desafíos da creación de contidos dixitais congregou a máis de 300 asistentes que puideron seguir a sesión a través da rede.
Os retos do sector das artes escénicas
As artes escénicas centrarán o segundo diálogo do ciclo que chega o vindeiro venres 22 de maio conducido pola comisaria do Xacobeo 2021, Cecilia Pereira, e que contará con dous participantes de longa e consolidada traxectoria. Dunha banda, Carlus Padrissa (Balsareny, 1959), un dos directores artísticos de La Fura dels Baus, que forxou obras como Accions (1984), Suz/O/Suz (1985), Tier Mon (1988) ou Noun (1990), que consolidaron o traballo da compañía. Impulsor da participación do grupo na cerimonia de apertura dos Xogos Olímpicos de Barcelona de 1992, conta cun amplo abano de aclamadas postas en escena de óperas na súa traxectoria. Capitanea tamén un dos proxectos máis ambiciosos da Fura: converter o barco Naumon nun escenario flotante de 60 metros de longo e 1.100 toneladas. Padrissa acaba ademais de crear un novo espectáculo titulado Nueva Normalidad, baseado na loita da humanidade contra a pandemia no mundo.
Estará acompañado de Marta Pazos, (Pontevedra, 1976), directora artística e dramaturga de Voadora, compañía que se ten consolidado como unha das máis inquedas da vangarda escénica española e xunto á que desenvolve unha linguaxe propia baseada na plástica, a música, a hibridación de disciplinas e a investigación escénica constante. Licenciada en Belas Artes pola Universidade de Barcelona, dirixiu ópera e teatro para centros de produción como o Teatro Real, Teatro Lliure, Teatro Español, Centro Dramático Galego e actualmente para o Centro Dramático Nacional. A súa persoal linguaxe e a ollada plástica aplicada á escena convértena nunha das directoras máis relevantes da súa xeración. En 2019 estrea as óperas A amnesia de Clío de Fernando Buide e Je Suis Narcissite de Raquel García Tomás, que optou aos International Opera Awards como mellor estrea mundial do pasado ano. No contexto actual, está a realizar ensaios online para facer fronte á situación de distancia social imposta pola emerxencia sanitaria.
O encontro desenvolverase a partir das 18,00 horas a través de videoconferencia e nel están convidadas a participar todas as persoas interesadas, que deberán rexistrarse, previamente e de balde, a través da web cidadedacultura.gal, onde está dispoñible toda a información sobre o encontro.
Oito sesións con profesionais do sector cultural
Os Foros #ACULTURASEGUE. Reflexións sobre a cultura na era post-COVID-19 programan un total de oito sesións centradas en diferentes temas e problemáticas que afectan ao sector das industrias culturais e creativas, cos que a Xunta de Galicia convida a profesionais e expertos en cada materia, tanto de Galicia como de fóra da nosa Comunidade.
Así, ademais das artes escénicas, en vindeiros foros abordaranse por exemplo os retos aos que se enfrontan os sectores da música, das artes plásticas ou do libro na era post COVID-19, pero tamén outras cuestións como novos formatos e mercados, novas fórmulas de xestión de dispositivos culturais ou o novo perfil de consumidor e a superación da desconfianza dos e das asistentes a eventos culturais no contexto da nova situación sanitaria global.
O Consello da Xunta analizou na súa reunión de hoxe un informe da Consellería do Medio Rural sobre o anteproxecto de Lei de loita contra os incendios forestais de Galicia (LLCIF), antes da súa remisión para consulta ao Consello Forestal de Galicia, cuxa reunión está prevista para mañá martes. A futura normativa prioriza reforzar a protección da poboación e a xestión integral do territorio. O presidente do Goberno autonómico, Alfonso Rueda, lembrou que actual lexislación sobre incendios forestais 'ten case 20 anos' e 'cómpre actualizarla e adaptala aos novos tipos de lumes así como aos avances que houbo tanto na loita como na prevención de incendios'.
Galicia é a rexión que máis solicitudes presentou en Europa para participar en proxectos interrexionais de I+D+i. Así o indican os datos da Vanguard Initiative, alianza europea da que a nosa Comunidade forma parte, xunto a outras rexións, para estimular o crecemento europeo da I+D+i a través da colaboración entre territorios de distintos países e a especialización intelixente. Precisamente a Xunta vén de publicar a convocatoria VInnovate Galicia, unha liña de axudas para organismos de investigación e empresas que presenten proxectos con outras rexións. Para poder candidatar á convocatoria VInnovate Galicia da Xunta, cuxo prazo de presentación de propostas está aberto desde hoxe ata o 19 de outubro, os posibles participantes teñen que presentarse antes á fase europea.
