miércoles, 12 de agosto de 2026
A Xunta colabora un ano máis co ciclo de concertos Galicia Importa, renomeado na súa novena edición como Xacobeo Importa no marco das actividades culturais previas á celebración do Xacobeo 2021. A nova temporada desta programación, organizada pola promotora galega Sweet Nocturna co apoio da Consellería de Cultura e Turismo, arranca con nove concertos ata finais de maio que configuran unha proposta heteroxénea e de gran calidade artística.
A primeira destas citas será a que protagonizará mañá venres, ás 22,00 h., na Sala Capitol de Santiago de Compostela a banda norteamericana de stoner rock Monster Magnet, na que é a súa primeira visita a Galicia. O concerto de mañá insírese na súa xira europea Powertrip A Celebration! Plus Much More... na que o grupo orixinario de New Jersey está a celebrar o vixésimo aniversario do seu maior éxito discográfico.
Este mesmo fin de semana terá lugar en Vigo a segunda das actuacións desta nova edición, que correrá a cargo dos británicos Tindersticks no Auditorio Afundación. A programación inclúe outras sobresaíntes figuras do panorama musical internacional en moi diferentes estilos, como The Bellrays (22 de marzo na SalaSon de Cangas), The Cat Empire (25 de marzo na Sala Capitol de Santiago), Ash (5 de abril, tamén na Capitol), Michael Kiwanuka (10 de maio no Auditorio Pazo de Congresos Mar de Vigo), Bebel Gilberto (15 de maio no Teatro Afundación de Vigo), JD McPherson (26 de maio na sala Masterclub de Vigo) e Jordan Mackampa (30 de maio no Vello Cárcere de Lugo).
Do mesmo xeito que no anterior Xacobeo 2010, o ciclo adapta o seu nome á celebración do de 2021 afondando no seu obxectivo orixinario: achegarlle ao público galego os directos de destacados nomes da música nun formato especial e máis próximo, como alternativa a eventos musicais de carácter máis masivo.
Con oito edicións anteriores e máis de 40 concertos celebrados, a súa aposta pola descentralización e desestacionalización conseguiu situar Galicia no calendario das xiras europeas de artistas do talle de Joan Baez, Alice Cooper, Yo la tengo, Teenege Fan Club, Interpol ou St. Etienne, entre moitos outros.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
