lunes, 30 de junio de 2025
O director da Axencia Galega das Industrias Culturais (Agadic), Jacobo Sutil, e o presidente da Federación de Cineclubes de Galicia (Feciga), Manuel Precedo, asinaron hoxe o convenio de colaboración mediante o que a Xunta colabora un ano máis no desenvolvemento dunha ampla programación nos cineclubs asociados. Segundo se recolle no documento, a oferta de 2020 articúlase arredor dunha vintena de ciclos e semanas de cine, así como dunha serie de actividades paralelas que manteñen como obxectivo común reforzar o papel destas asociacións culturais como alternativa aos circuítos cinematográficos comerciais.
A achega económica da Xunta aos proxectos impulsados pola Feciga sitúase nos 30.000 euros, destinados ao mantemento dunha programación estable e de calidade nos cineclubs galegos, ao tempo que se contribúe ao seu labor de difusión e de creación de públicos para o cinema.
Esta nova programación estrutúrase inicialmente arredor de 13 ciclos e de oito semanas de cine. Promovidos pola Federación de Cineclubes a partir dunha temática ou estilo determinados, a carteleira de cada un dos ciclos será seleccionada polos centros participantes a partir do catálogo proposto. No caso das semanas de cine, a organización corre a cargo dos propios cineclubs que, xunto coas proxeccións, desenvolven diferentes actividades paralelas como debates, obradoiros e exposicións.
A previsión para 2020 é que se sumen ao programa de ciclos os cineclubs de Bueu, Cangas de Morrazo, Poleiro de Goián (Tomiño), Valle Inclán de Lugo, Liceo de Noia, Groucho Marx do Barco de Valdeorras, O Carballiño, Padre Feijoo de Ourense, Val Miñor Alice Guy de Nigrán, Pontevedra, A Lanterna de Viana do Bolo, Lumière de Vigo e Adega de Vilagarcía de Arousa. Pola súa banda, as semanas de cine terán lugar nos devanditos cineclubs de Cangas, Lugo, O Barco, O Carballiño, Ourense, Viana do Bolo e Vilagarcía, ademais de nos Papeiros de Chantada.
Entre as actividades complementarias, a Feciga sumarase á celebración do 50º aniversario do Padre Feijoo organizando en Ourense un encontro de cineclubles e participará nos XX Encontros de Cinema de Viana do Castelo (Portugal).
Galicia reforza por terceiro curso consecutivo o seu liderado na taxa de escolaridade de 0 a 3 anos e achégase ao 65 %, máis de 15 puntos por riba da media de España, segundo os últimos datos oficiais que vén de publicar hoxe o Ministerio de Educación, Formación Profesional e Deportes. Deste xeito, Galicia segue sendo a comunidade autónoma onde máis familias poden acudir a unha escola infantil totalmente gratuíta. As cifras oficiais revelan que Galicia rexistrou no curso 2024-2025 unha taxa do 64,3 % de escolarización, máis de catro puntos por riba do 60,6 % acadado no período anterior. Esta porcentaxe mantén á comunidade ao nivel dos países con maiores índices de benestar en Europa, como Suecia ou Dinamarca.
No marco do Plan de Actuacións da Xunta de Galicia fronte aos posibles efectos das altas temperaturas sobre a saúde, vénse de activar o nivel 1 de alerta a diversas áreas da comunidade autónoma por episodio de calor. Meteogalicia informa que a partir da xornada do venres 27, as altas presións volverán localizarse ao norte da península Ibérica, achegando unha masa de aire moi cálida de orixe norteafricana. Isto fará que as temperaturas experimenten significativos ascensos, tanto nos valores mínimos como nos máximos. Este ascenso de temperaturas comezará a notarse desde ese mesmo día, cando en moitos puntos de Galicia se superarán os 30ºC, e mesmo os 35ºC, en puntos do interior.
