viernes, 18 de septiembre de 2026
Os datos da enquisa anual do IGE tamén indican que os indicadores que miden a desigualdade de ingresos situáronse en Galicia en mínimos históricos. Así, o índice de Gini baixou ao 0,265 e o indicador S80/S20 que mide a diferencia entre o quintil máis rico e o máis pobre- tamén descendeu ata o 4,01. En ambos casos son as cifras máis baixas de toda a serie histórica, iniciada no ano 2007.
Mínimo histórico de fogares con dificultades
A enquisa do organismo estatístico galego mostra que en 2018 seguiron mellorando as condicións económicas dos fogares galegos. De feito, o número de fogares que chegan con algunha dificultade a final de mes baixou ao 46,28%, a cifra máis baixa de toda a serie histórica. Esta serie comeza no ano 2007, cando o número de fogares con algunha dificultade en Galicia era 20 puntos maior (66,01%).
Esta mellora da situación económica dos fogares galegos é consecuencia da baixada tanto do número de fogares con dificultade (que baixa do 38,17 ao 37,81%) como do descenso de fogares con moita dificultade, que pasan do 9,65 ao 8,47%. Ambos indicadores tamén acadaron en 2018 o nivel máis baixo de toda a serie histórica, iniciada en 2007.
Ademais, o número de fogares con carencia material severa tamén se reduciu en 2018 ao pasar do 4,8 ao 4%. Esta é igualmente a menor cifra da serie histórica, que comeza no ano 2011, cando o número de fogares nesta situación era do 7,8%.
Ingreso medio por fogar
A Enquisa Estrutural a Fogares confirma a senda á alza dos ingresos dos fogares galegos que se viña rexistrando nos últimos anos. En concreto, o ingreso medio por fogar ascendeu en 2018 ata os 2.196 euros, a maior cifra contabilizada ata agora polo IGE logo de acadar un incremento do 5,63% respecto ao ano anterior.
Ao mesmo tempo, ao mellora do mercado laboral propiciou un incremento dos ingresos procedentes do traballo por conta allea (aumentan ata o 51,48%) e do traballo por conta propia (10,84%), mentres que se reducen os ingresos procedentes de prestacións supoñen o 34,83%- e as rendas e outros ingresos, que representan o 2,84%.
Composición dos fogares
Os datos anuais do IGE tamén analizan a composición dos fogares galegos, que acadan a cifra de 1.062.822. En 2018, a tipoloxía máis habitual foi a dunha parella con fillos (31,33%), seguida da parella sen fillos (23,5%) e os fogares unipersoais, que supoñen o 22,78% do total. Ademais, o 23,78% dos fogares de Galicia están compostos por persoas de 65 ou máis anos, mentres que no 22,85% viven unha ou varias persoas menores de 16 anos.
A Enquisa Estrutural a Fogares é unha actividade estatística anual dirixida aos fogares galegos co obxecto de obter información sobre as súas características socioeconómicas, e inclúe información detallada sobre as distintas áreas territoriais galegas.
Tivo lugar o acto de entrega dos Premios de Responsabilidade Social Empresarial de Galicia 2026, que puxeron en valor a importancia de promover unha cultura empresarial que integre a responsabilidade social no seu modelo de xestión e sitúe as persoas no centro da actividade. As entidades premiadas foron Galaica Consultaría Integral e Nasas Social Media, na categoría de pequena empresa; Torres y Sáez, na de mediana empresa; Citanias Obras y Servicios, na de grande empresa; e Altia, coa Mención á Conciliación.
A conselleira do Mar, Marta Villaverde, defenderá ante o Goberno central a posición de Galicia sobre o futuro da Política Pesqueira Común, baseada na necesidade de garantir financiamento suficiente para o sector, facilitar a renovación e modernización da frota e avanzar cara a un modelo de xestión que teña en conta tanto a conservación dos recursos como a viabilidade económica e social da actividade. Villaverde trasladará que Galicia afronta este debate desde unha posición singular pola dimensión e diversidade do seu complexo mar-industria, cunha extensa frota de baixura e pequena escala, unha importante presenza da altura e gran altura, unha industria transformadora e conserveira de referencia e unha acuicultura cun destacado peso na produción comunitaria.
