sábado, 7 de noviembre de 2026
O Diario Oficial de Galicia publica hoxe unha orde que resolve a inscrición de centros bibliotecarios públicos municipais dos concellos de Entrimo, Guitiriz, Muras, Muros e San Cristovo de Cea no Rexistro de bibliotecas de Galicia. Todos eles, e en virtude doutra orde tamén publicada nesta xornada no DOG, tamén se integrarán na Rede de bibliotecas de Galicia, xunto aos concellos de Cerdedo-Cotobade, Dumbría, Lousame, A Pastoriza e Portas.
A inscrición no Rexistro de Bibliotecas de Galicia é o paso previo á integración na Rede de Bibliotecas, que lles permitirá ter obter acceso ás axudas e subvencións que anualmente convoca a Consellería de Cultura e Turismo tanto para adquisición de fondos para bibliotecas como para actividades de dinamización que fomenten a animación á lectura. Así mesmo, terán acceso ao Sistema Integrado de Xestión Bibliotecaria KOHA xa nos primeiros días de 2020, a excepción dos casos de Dumbría e Lousame que precisarán realizar un proceso de migración automatizada de datos.
Cómpre destacar que o persoal bibliotecario poderá participar nos programas de formación que convoca anualmente a Consellería de Cultura e Turismo para incrementar a calidade dos servizos que prestan aos usuarios.
Coa integración destes servizos bibliotecarios na Rede de Bibliotecas de Galicia cúmprese o obxectivo de que todas as bibliotecas públicas municipais de Galicia que estean activas se atopen en igualdade de condicións á hora de accedes ás axudas públicas así como a todos os recursos que ofrece a Administración autonómica á local neste ámbito. Nestes momentos trabállase para que todos os servizos bibliotecarios municipais de Galicia conten co sistema KOHA no 2020, dando cobertura territorial total á implantación do carné único das bibliotecas públicas de Galicia e ao acceso á biblioteca en liña para o préstamo de libro dixital e de audiovisuais galegos, GaliciaLe.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
