domingo, 8 de noviembre de 2026
O Centro Tecnolóxico do Mar (Cetmar), dependente da Consellería do Mar, busca desde hai ano e medio cos seus socios do proxecto Sealab o xeito de mellorar os servizos de análise de determinadas substancias prioritarias nas augas interiores e, con ese obxectivo, está a traballar no desenvolvemento dun innovador sistema de medición da calidade da auga. A finalidade é desenvolver un laboratorio portátil que incorpora nanosensórica e que desde un vehículo de superficie non tripulado de doado despegue envía información das súas misións a unha plataforma que xestiona e centraliza a información, facilitando a toma de decisións aos seus usuarios.
Precisamente, para presentar os avances do proxecto, a Fundación Cetmar acolle o próximo mércores unha xornada de difusión. Ese laboratorio incorporará, ademais dun sistema de toma e xestión de mostras automatizado, unha nova sensórica de desenvolvemento propio baseada no uso das denominadas Tecnoloxías Facilitadoras Esenciais para a determinación de substancias prioritarias, clasificadas así segundo a Unión Europea porque supoñen un risco significativo para o medio como son compostos orgánicos, elementos derivados de usos industriais ou degradación de combustibles fósiles, entre outros.
O proxecto Sealab, que comezou en 2018 e se desenvolverá ata setembro de 2020, está liderado pola empresa galega Indrops Laboratorio, xunto a Industrias Ferri, Imatia Innovation, e coa participación do INL (International Iberian Nanotechnology Laboratory) e a Unidade de Tecnoloxías Mariñas do Centro Tecnolóxico do Mar. A iniciativa conta ademais co financiamento da Consellería de Economía, Emprego e Industria a través da Axencia Galega de Innovación (Gain) mediante o programa Conecta Peme 2018, que pretende fomentar a cooperación entre pemes e outros axentes do sistema rexional de innovación mediante o apoio a proxectos de I+D+i orientados ao mercado.
A xornada de difusión do proxecto Sealab celebrarase na sede da Fundación Cetmar en Vigo o vindeiro mércores a partir das 10,45 horas. A asistencia é de balde previa inscrición vía web neste enlace, onde tamén se pode consultar o programa do evento.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
