sábado, 7 de noviembre de 2026
Entre as medidas do Pacto de Estado contra a Violencia de Xénero figuran reforzar e ampliar en materia de Educación, os valores igualitarios e a educación afectivo-sexual obrigatoria en todos os niveis educativos, fomentando que se traten de forma integral, ademais de abordar a prevención da violencia de xénero, o machismo, as condutas violentas, a educación emocional e sexual e a igualdade, o valor da diversidade e a tolerancia. Outras liñas de traballo serían a formación permanente a docentes en materia de prevención da violencia de xénero.
De acordo co recollido no Plan de Estado, o convenio apoiará a realización de campañas que teñan como público obxectivo a mocidade utilizando preferentemente as tecnoloxías da información e da comunicación. Neste senso, tamén se contempla o desenvolvemento de actividades formativas sobre o uso axeitado e crítico de internet e as novas tecnoloxías, especialmente na protección da privacidade e sobre os ciberdelitos. Outra liña de actividade será a formación especializada en violencia de xénero para profesionais de medios de comunicación.
As unidades de Igualdade universitarias galegas traballarán tamén na realización de estudos sobre o impacto do acoso, as agresións e os abusos sexuais no ámbito universitario o que permitirá valorar, no seu caso, a oportunidade de realizar campañas de prevención nos campus e, de forma particular, das agresións sexuais en cita. Outros posibles campos de estudo serán a situación das mulleres maiores de 65 anos que sofren violencia de xénero, e preparar recursos adaptados a elas, e sobre a situación de menores (custodia, réxime de visitas, relacións co pai maltratador,...).
Outras cuestións recollidas no documento asinado son a promoción dende as administracións públicas e organizacións empresariais da mellora da formación recibida por responsables das empresas e representantes sindicais, así como o deseño de programas de prevención, detección e protocolos especializados ou a actualización dos existentes en atención e actuación, adaptándoos ás especificidades das diferentes violencias sexuais. Neste mesmo contexto, procurarase o desenvolvemento de protocolos de intervención e detección precoz en todos os ámbitos educativos.
Finalmente, entre as medidas do Plan de Estado figuran o fomento da investigación en violencias sexuais, a través de estudos diagnósticos, desenvolvemento estatístico, unificación de datos e a súa difusión, e os estudos de prevalencia e deseño de indicadores para todos os tipos de violencias sexuais, así como establecemento dun sistema de análise estatística que recolla as violencias machistas que sofren as mulleres que exercen a prostitución.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
