viernes, 25 de septiembre de 2026
O presidente da Xunta, Alberto Núñez Feijóo, avanzou hoxe na rolda de prensa do consello a futura implantación dunha Estratexia galega para a atención a persoas en situación de cronicidade co obxectivo de poder realizar un seguimento máis completo e pormenorizado destes pacientes e evitar a progresión das enfermidades crónicas cara a estadios máis complexos.
Será un modelo máis coordinado e innovador, que integrará todos os programas específicos que se veñen desenvolvendo nos últimos anos, e cuxa implantación será progresiva. Comezando por aquelas enfermidades máis prevalentes e polos pacientes afectados por varias condicións crónicas, concretamente os 21.000 pacientes galegos inmobilizados que están en situación de vulnerabilidade.
Durante a súa intervención, Feijóo tamén detallou cal será o funcionamento deste modelo. Así, sinalou que en primeiro lugar se incluirá a estes pacientes nun programa de atención á cronicidade. En segundo termo, dixo, designarase a un profesional da enfermaría ou facultativo ou a un equipo sanitario que actúe como interlocutor cos pacientes e os seus familiares. Posteriormente, explicou, realizarase unha avaliación das necesidades personalizadas de cada paciente.
E, finalmente, elaborarase un Plan individualizado de acción Integral (PIAI) consensuado co paciente e/ou as persoas encargadas do seu coidado. O dito plan, que constituirá unha das principais novidades da Estratexia, recollerá á súa vez os plans terapéuticos e os obxectivos asistenciais, será xestionado polo persoal de referencia asignado e outorgará protagonismo ao paciente en todo o proceso de toma de decisións situándoo no centro de toda a estratexia.
En definitiva, concluíu, esta estratexia permitirá seguir mellorando o coidado, seguimento e autonomía destes pacientes en situación de cronicidade que precisan dunha atención sanitaria e social moi concreta.
O calendario de Programación Kármica arranca este 25 de setembro con Taïn na Sala Guión de Pontedeume. A seguinte cita será o 16 de outubro, con Camellos e Cora Yako en La Conservera de Viveiro, mentres que o 24 de outubro actuarán Javier Lago e Santi Araújo na Pousada da Galiza Imaxinaria de Boiro. O ciclo chegará precisamente á sala que acolle hoxe a súa presentación, A Cofradía de Vilanova de Arousa, o 27 de novembro, coas actuacións de Montedapena e Nuntia. O programa de 2026 pecharase o 26 de decembro na Pousada da Galiza Imaxinaria con Portosanto e Hermanos Visi.
O Instituto Nacional de Estatística (INE) publicou este martes os datos da enquisa de ocupación hoteleira na comunidade galega, que revelan que os hoteis e pensións galegas ingresaron nos oito primeiros meses do ano 334,7 millóns de euros, que revelan un incremento do 6,6% con respecto ao mesmo período do pasado ano. A rendibilidade hoteleira medra nos oito primeiros meses do ano o 7,5%. Só no mes de agosto, o sector tivo uns ingresos de 92,4 millóns de euros que se traducen nunha suba do 8,8% con respecto ao mesmo mes do ano pasado. Por primeira vez supérase a barreira dos 90 millóns de euros de ingresos no mes de agosto rexistrando un máximo histórico.
