Nota de prensa del Gabinete de Comunicación del PPdeG:
O secretario xeral dos populares galegos, Miguel Tellado, asegurou que os sindicatos veñen de confirmar que prefiren bloquear a Xustiza que sentarse a negociar. Así, logo da súa negativa a entrevistarse co conselleiro Alfonso Rueda, o que amosan é que prefiren seguir secuestrando a sociedade galega cun bloqueo da Administración de Xustiza, que penaliza a todos aqueles que precisen os servizos da mesma. Non se pode sustentar un acordo na reivindicación coa condición dunha suba salarial como a que plantexan os sindicatos, apuntou Tellado ao tempo que engadía que parten de posicionamentos que son inasumibles porque non teñen ganas de pactar senón intención de persistir na súa vontade de converter aos galegos en reféns das súas demandas.
Os representantes sindicais están condenando a miles de cidadáns a uns retrasos inxustificados nos seus trámites e causas pendentes e, tal e como sinalou o número dous do PPdeG, querer gañar máis non xustifica en ningún caso o bloqueo ao que se está sometendo á Administración de Xustiza sen respectar aos que non secundan as súas mobilizacións e os seus paros. Ademais, Tellado tamén evidenciou que tense demostrado que buscan escusa tras escusa para non estar na mesa de negociación, da que se levantaron tres veces. Querer gañar 3.000 euros máis non é unha escusa razoable e defendible ante o pobo de Galicia para paralizar os xulgados de toda a Comunidade Autónoma.
Nota de prensa del Gabinete de Comunicación del PSdeG:
O secretario xeral do PSdeG, Gonzalo Caballero, reprochou a Alfonso Rueda que prefira chantaxear aos traballadores da Xustiza, que superan as dúas semanas de folga, antes que amosar vontade de diálogo. E é que, en palabras do líder dos socialistas galegos, mentres Rueda segue cobrando, a diferenza do que ocorre co persoal en folga, a Xustiza galega segue paralizada sen que o conselleiro responsable busque unha solución ao conflito laboral.
A súa decisión de condicionar a súa entrada na negociación ao fin da folga dá a mostra, proseguiu Gonzalo Caballero, de que o PP carece de sensibilidade cos traballadores e de capacidade de resolución dos conflitos. Intenta plantear un órdago en clave de chantaxe cando non cumpre o seu deber como xestor, que é negociar cos implicados, criticou o dirixente socialista, quen considerou una falla de respecto que Rueda aínda non se teña sentado cos traballadores afectados.
Gonzalo Caballero recordou ao vicepresidente de Feijóo que as folgas son un dereito e censurou que ningún dos dous estea en condicións de ofertar á sociedade vontade ou capacidade de negociación e diálogo cos axentes sociais.
Nota de prensa del Gabinete de Comunicación del BNG:
O BNG volve trasladar todo o seu apoio e solidariedade cos traballadores e coas traballadoras da Xustiza tras as declaracións do vicepresidente da Xunta, Alfonso Rueda, chantaxeando ao funcionarios en folga para esixir o fin das discriminacións salariais e en demanda dunha administración de xustiza áxil, eficaz e moderna propia do século do XXI.
É absolutamente condenable a actitude da Xunta e a posición chantaxista que expresa, día si día tamén, o vicepresidente Alfonso Rueda, que en vez de esmerarse en ser unha solución demostra que é unha parte do problema. Nunha democracia é inadmisible que un Goberno pretenda chantaxear aos traballadores e traballadoras cando están exercendo o seu lexítimo dereito á folga, salientou a portavoz nacional, Ana Pontón.
Para a dirixente do Bloque é a Xunta que toma como reféns aos galegos e as galegas dinamitando as negociacións, por iso, desde a formación nacionalista demanda ao Goberno de Feixóo que acepte a mediación do Consello Galego de Relacións Laborais (CGRL): Ten que abandonar a prepotencia e a chulería que durante estes quince días ten paralizada a Xustiza e entrar pola senda da razón, porque é evidente que tras unha folga tan intensa están reclamacións xustas porque ninguén fai folga por deporte, salientou Pontón.
Nota de prensa del Gabinete de Comunicación de En Marea:
O voceiro de En Marea, Luís Villares, cualificou de chantaxe as declaracións do vicepresidente da Xunta de Galicia, Alfonso Rueda, ao dicir que non se vai sentar a negociar ata que se suspenda a folga. Alfonso Rueda tivo tempo de sobra de solucionar o conflito antes de que se iniciase a folga asegurou Villares.
O voceiro de En Marea asegurou que estamos fartas dunha actitude absolutamente prepotente e soberbia por parte da Xunta de Galicia que está a provocar moito sufrimento ao conxunto da poboación ao incrementar o xa estrutural colapso da Xustiza. Así mesmo, denunciou o sufrimento que se está a causar tamén a uns traballadores e traballadoras que están deixando de cobrar nun servizo que nos afecta a todos e a todas.
Esiximos a Alfonso Rueda que inmediatamente e incondicionalmente sente na mesa de negociacións lembrándolle que é un mandato do Parlamento de Galicia que acordou por unanimidade no mes de decembro de 2017 aceptar as reclamacións destes traballadores e traballadoras declarou Luís Villares.
Para o voceiro de En Marea non é aceptable que non cobren a metade dos seus salarios cando se poñen enfermos, non se suspenden nin as hipotecas nin os fillos e fillas deixen de comer polo que non é aceptable que lles rouben a metade do seu traballo. Igualmente non é aceptable que sexan discriminados cobrando menos nunha substitución do que percibe o substituído. E tampouco é aceptable que non se produza unha reposición das prazas amortizadas, ou que se manteñan os recortes nos seus salario mentres Feijóo subiuse un 7 por cento o seu salario.
Para En Marea esas son as únicas condicións que Rueda ten que levar á mesa de negociación para recoller as demandas destes traballadores e traballadoras e deste xeito poñer fin á folga.