sábado, 7 de noviembre de 2026
Nota de prensa del Gabinete de Comunicación del PPdeG:
O portavoz do Grupo Popular, Pedro Puy, amosou o apoio ao marco político e institucional vixente en Galicia porque é democrático e garante o autogoberno, resultado da libérrima opinión da gran maioría dos galegos e galegas, que apoian o Estatuto e a Constitución.
Pedro Puy asegurou que no PPdeG cremos na democracia, nas regras e na política como acción pública que busca o ben común, pero tamén como compromiso. Exercer a soberanía non é darlle a razón ao BNG, logo de tres referendos e 10 procesos electorais con sucesivas vitorias de partidos que defenden a Constitución e o Estatuto de Autonomía, apuntou.
Na súa intervención, o portavoz popular manifestou que Galicia conta cun marco xurídico instaurado, a través do referendo celebrado en 1978 e da aprobación do Estatuto de Autonomía en 1980, e exerce o seu autogoberno a través do Parlamento e a aprobación de 433 leis desde o inicio da autonomía.
Nota de prensa del Gabinete de Comunicación del PSdeG:
O portavoz do Grupo Socialista, Xoaquín Fernández Leiceaga, instou á Xunta a fixar unha cifra como obxectivo nas negociacións do futuro modelo de financiamento autonómico. Así o dixo no debate dunha interpelación ao conselleiro de Facenda, na que criticou que eviten comprometerse porque cren que a negociación vai ir mal.
O responsable socialista acusou ao goberno galego de xogar coas cartas marcadas para anticipar un mal resultado e poder dicir que a pesares de todo saímos moi ben. Lembrou que a Comisión de Expertos do goberno apuntaba a un investimento adicional para as comunidades autónomas dun mínimo de 16.000 millóns de euros para restablecer o peso do gasto social nas comunidades autónomas.
Fernández Leiceaga urxiu ao goberno galego a presentar unha cifra como obxectivo mínimo para que Galicia quedara satisfeita, e reclamou que o goberno explique os criterios que quere introducir na negociación para acadar unha mellor ponderación do peso relativo de Galicia no modelo de financiamento, tales como as necesidades de gasto, avellentamento ou dispersión poboacional.
Criticou tamén a incongruencia entre os membros da Xunta, xa que logo da xuntanza dos presidentes de Galicia, Asturias, Castela e León e Aragón reclamaran unha solución aos mecanismos extraordinarios de financiamento, en contra do que dixo hoxe o conselleiro. Reclamoulle que abordemos a reforma da maneira que resulte máis beneficiosa para nós.
Advertiu que a entrada en xogo do FLA ou do Fondo de Facilidade Financeira supuxo que Galicia pasara de estar un pouco por enriba da media no financiamento a estar moi por debaixo, en beneficio das autonomías incumpridoras. Reclamou por iso unha solución igualitaria que elimine os ditos mecanismos e fixe un límite á reestruturación ou quita da débeda a partir do cal as comunidades autónomas teñan que emitir débeda ao mercado.
Fotografía: Gabinete de Comunicación del PPdeG
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
