jueves, 13 de agosto de 2026
Nota de prensa del Gabinete de Comunicación de la Xunta de Galicia:
O responsable socialista explicou que Galicia pasou de estar financiada por enriba da media, de acordo co modelo de 2009, a situarse por debaixo ao incorporar os mecanismos extraordinarios de financiamento de Montoro FLA e Fondo de Facilidade Financeira-. Espetoulle a Feijóo que vostede é o presidente que por primeira vez na historia ve como Galicia se sitúa por debaixo da media de financiamento.
Fernández Leiceaga acusou ao presidente da Xunta de manter o triste papel de que suceda isto sen dicirlle nada a Montoro, sen dicirlle que é inaceptable porque financian máis ás incumpridoras e ás que teñen máis recursos, como o País Vasco, que ás que teñen máis necesidade de recursos, como Galicia.
O portavoz socialista sustentou a súa intervención no estudo asinado polo director executivo da Fundación de Estudos de Economía Aplicada Fedea-, membro da Comisión de Expertos de financiamento autonómico e asesor de Facenda, Ángel de la Fuente. Este sinala que Galicia situouse co modelo de 2009 por riba da media, pero que pasou a situarse por debaixo despois dos mecanismos extraordinarios postos en marcha en 2012.
Este novo modelo aplicado de facto supuxo máis de 5.000 millóns de euros de financiamento adicional para comunidades autónomas como Cataluña, mentres Galicia só percibiu 29. Por habitante e ano, precisou, algunhas comunidades autónomas recibiron 140 euros, mentres Galicia foi a peor tratada de todas, con apenas un euro adicional por habitante.
Fernández Leiceaga criticou a indolencia do presidente galego mentres isto sucedía, sometendo ao Parlamento a un apagón informativo dende o ditame presentado en xullo pola Comisión de Expertos sobre o novo modelo de financiamento autonómico. As conclusións daquel documento apuntan que a administración debera compensar ao conxunto do sistema entre 8.700 e 16.000 millóns de euros adicionais.
Criticou que o presidente da Xunta teña eludido ata hoxe presentar o nivel de esixencia mínimo de Galicia en relación a estes fondos adicionais, a pesares de que asinou un protocolo cos presidentes autonómicos e un convenio con Asturias e Castela e León reclamando novos recursos.
O portavoz socialista esixiulle a Feijóo que actúe con transparencia, facendo un exercicio de firmeza e demostrando capacidade de liderado para explicarse ante a Cámara e plantarse diante de Facenda coa posición de Galicia.
Sen embargo, advertiu, o conselleiro de Economía negocia co Goberno sen informar ao Parlamento e Feijóo evita cifrar o nivel mínimo ao que aspira para que Galicia teña a capacidade de prestar servizos básicos en boas condicións.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
