jueves, 13 de agosto de 2026
Nota de prensa del Gabinete de Comunicación de CC.OO.-Galicia:
O Sindicato Nacional de CCOO de Galicia celebrou o seu primeiro Consello Nacional tras o 11.º Congreso, que tivo lugar o pasado mes de maio. O conclave transcorreu no edificio CERSIA, en Santiago de Compostela, e nel participou como convidado o secretario xeral confederal, Unai Sordo, quen interveu perante os membros do máximo órgano das CCOO de Galicia entre congresos.
Amais de por Sordo, a Confederación Sindical de CCOO estivo representada tamén pola secretaria de Comunicación, Empar Pablo. Así mesmo, outras institucións e organizacións sociais estiveron presentes, caso do Sindicato Unificado da Policía (SUP), a Fundación 10 de Marzo (F10M), a Delegación Territorial da Inspección de Traballo e Seguridade Social ou o Consello Galego de Relacións Laborais.
O secretario xeral confederal criticou o Goberno español por «vangloriarse» de que o 72 % das traballadoras e traballadores teñen un contrato indefinido, xa que iso mesmo significa que máis da cuarta parte ten contrato temporal ou, «o que é o mesmo: España é subcampioa de Europa en temporalidade, só por tras de Polonia».
Segundo o dirixente sindical, estanse a reproducir algunhas das «vellas pautas de comportamento» do mercado laboral en España, o que podería desembcoar na «próxima crise de emprego» se as melloras macroeconómicas non chegaren á cidadanía. Sordo enfatizou que «non vale medrar de calquera xeito se o crecemento non repercute na cidadanía».
Unai Sordo tamén apuntou que a economía española crece a un 3,2 %. Porén, unha análise máis detallada revela que de todo ese crecemento, o 2,2 % máis da metade é debido a factores externos. Por esta razón, instou a habilitar os mecanismos que permitan a mellora da demanda interna. Na súa opinión, isto só se conseguirá co incremento do salarios e das prestacións sociais particularmente as pensións.
«Abonda xa de triunfalismos mentres se está a incrementar a desigualdade», exhortou Sordo, ao tempo que apuntou que a desigualdade é «parte esencial» do modelo de saída da crise que se promoveu. Fronte a isto, o sindicalista asegurou que CCOO está «en disposición de pasar á ofensiva», xa que os salarios medran menos da metade que o ritmo de crecemento da economía. «Queremos impulsar cara arriba os salarios», insistiu.
Posteriormente, en declaracións aos medios de comunicación, o secretario xeral confederal detallou que CCOO pretende que o salario mínimo interprofesional (SMI) chegue aos mil euros. Canto ás pensións, instou o Estado español a destinar o 15 % do PIB para a sostibilidade do sistema público de pensións.
O secretario xeral do Sindicato Nacional de CCOO de Galicia, Ramón Sarmiento, fixo un repaso dos catro primeiros meses do seu mandato e apuntou os retos inmediatos da organización, con especial atención ás mobilizacións que se están a preparar en diversos ámbitos.
Neste primeiro Consello Nacional tras o Congreso tamén se aprobou o regulamento provisional da Comisión de Garantías de Galicia, o calendario para a Conferencia de Organización e, por último, nomeouse a representación de Galicia no Consello Confederal de CCOO: Ramón Sarmiento (membro nato, como secretario xeral), Mabel Pérez (secretaria de Organización), Amelia Pérez (secretaria xeral de Vigo, a comarca de maior afiliación) e Víctor Ledo (secretario xeral de Industria, a federación de maior afiliación).
Fotografía: Gabinete de Comunicación de CC.OO.-Galicia.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
