jueves, 13 de agosto de 2026
Nota de prensa del Gabinete de Comunicación del BNG:
O BNG pide a comparecencia do presidente da Xunta para que explique no Parlamento o fiasco eólico do Goberno de Feijóo, que arrancou coa paralización dun concurso eólico impoluto e absolutamente legal por mero sectarismo político, e trouxo como consecuencia a perda de miles de empregos e millóns de investimentos, un retroceso nas posicións de Galiza e sancións que suman tres millóns de euros.
Por que os galegos e as galegas temos que pagar estes tres millóns de euros debido a actuación sectaria de Feijóo a cambio de seguir regalándolle a explotación do noso vento as súas empresas amigas?, interpelou a portavoz nacional, Ana Pontón, quen instou ao xefe do Executivo a pedir perdón polo engano, por sustentar con mentiras desmontadas polo TSXG a anulación dun concurso legal, porque as mentiras non poden ser a carta de presentación dun político.
Pontón subliñou que a decisión de Feijóo foi un erro garrafal que privou a Galiza de ter participación pública na explotación dun recurso natural e, polo tanto, de obter beneficios que quedan exclusivamente en mans de empresas privadas, ao tempo que denunciaba os paupérrimos resultados do que o PP anunciara como gran plan industrial para o sector eólico.
Dos 14.000 empregos prometidos, apenas un 13%, e tampouco serviu para saír da crise, pola contra perdéronse proxectos empresariais estratéxicos e Galiza perdeu posicións no desenvolvemento eólico, caendo da segunda a cuarta posición, e sendo o territorio con menor impulso desta enerxía desde 2008, denunciou a dirixente do Bloque.
A este balance súmanse as perdas millonarias con cargo ao erario público que Pontón considera debería asumir Feijóo do seu propio peto. Que pague co seu patrimonio persoal estes tres millóns de euros derivados dunha decisión sectaria, antes de que llo reclame o Tribunal de Contas, pediu a portavoz nacionalista, quen aventurou que dada a política deste tribunal nos últimos meses non tardará en chamar a declarar ao presidente de Xunta por unha decisión que roza a ilegalidade para que responda co seu patrimonio persoal.
A comparecencia de Feijóo que demanda o BNG tamén serviría, como explicou a portavoz parlamentaria de Industria, Noa Presas, para facer balanzo da política do PP en materia de enerxía eólica, cun resultado moi lesivo para as empresas galegas ao tempo que advertía dos cambios lexislativos que está levando a cabo o Executivo nesta materia.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
