viernes, 16 de mayo de 2025
Nota de prensa de la Real Academia Galega (RAG):
A biblioteca do CEIP Carlos Casares de Nigrán, capitaneada pola galiña azul que lle deu nome en 1968 ao seu primeiro libro infantil, acolleu a presentación do proxecto web Primavera das Letras dedicado a Carlos Casares. A Real Academia Galega celebrou así en Vilariño, o lugar onde o escritor estableceu o seu fogar en 1983 e onde escribiu unha parte importante da súa obra, o seu primeiro acto dentro da programación deseñada arredor do Día das Letras Galegas de 2017. Fíxoo da man da comunidade escolar do centro, a primeira en coñecer os novos contidos de academia.gal/primaveradasletras. A través deste portal, o profesorado de infantil e primaria, os pais e nais e o propio alumnado poderá acceder a propostas didácticas e lúdicas, parte delas interactivas, para se mergullar no universo literario e vital do escritor.
As actividades deseñáronse cun enfoque interdisciplinario e están relacionadas con distintos contidos do currículo escolar, de tal xeito que permiten traballar na aula, ou na casa, non só aspectos lingüísticos e literarios, senón tamén contidos e competencias de coñecemento do medio natural e social, historia ou educación artística. Como novidade, nesta segunda edición de Primavera das Letras haberá un concurso no que os centros educativos poderán contarlle á Academia como celebran o Día das Letras Galegas.
Tras a boa acollida da primeira edición deste proxecto, dedicada a Manuel María, a RAG decidiu adiantar a chegada da Primavera das Letras, de acordo con outro dos seus obxectivos: promover que a aprendizaxe arredor do Día das Letras Galegas non se limite aos días previos ao 17 de maio. Os materiais iranse publicando desde hoxe mesmo ata as vésperas desta data. Entre as propostas xa dispoñibles, figuran unha actividade interactiva centrada en Nigrán e fichas para coñecer o Entroido do Ourense natal do autor e poñerlle cores.
O centro escollido para a presentación leva o nome de Carlos Casares desde pouco tempo despois do seu pasamento. Con este xesto rendeulle homenaxe "ao veciño que traía os seus fillos a este colexio" e que "soubo amar a súa lingua e mirar para fóra, para compartir e aprender", expresou a directora, Ana Domínguez. A mestra foi a encargada de conducir o acto, no que un grupo de estudantes de 5º e 6º interpretaron un anaco d'A galiña azul, que marcou un fito na literatura en galego para os máis pequenos. Coa exposición de exemplares d'O principiño en máis de sesenta linguas que pertenceron á colección do homenaxeado como pano de fondo, o público tamén puido escoitar un fragmento da obra de Antoine de Saint-Exupéry en versión orixinal francesa e a súa tradución ao galego de Casares, nas voces dunha nai e unha alumna.
O presidente da Academia, Xesús Alonso Montero, salientou o empeño que o equipo docente deste CEIP pon en que o alumnado se achegue á literatura a través da escrita de Casares, que é, dixo, "unha maneira de que queden comprometidos para sempre coa literatura galega". Non en van, "foi capaz de entender os nenos e, polo tanto, escribir sobre e para os nenos", destacou. Casares é ademais autor de varias das "obras máis sólidas da narrativa galega", asegurou en referencia a Deus sentado nun sillón azul ou O sol do verán.
Carlos Casares escribiu estes dous libros no seu fogar de Vilariño, "o lugar onde viviu máis tempo e tamén onde máis tempo pasou escribindo", recordou pola súa banda Hakan Casares, fillo do autor, membro da Fundación Carlos Casares e exalumno do colexio, quen lle agradeceu tamén á RAG que escollese esta localidade para celebrar o primeiro dos seus actos dentro da programación prevista arredor do Día das Letras Galegas 2017 pola importancia que tivo na súa vida e obra. Na súa casa de Nigrán escribiu tamén miles das súas columnas para a prensa, que adoitaba redactar polas tardes, ou a colección infantil d'O Toribio.
O secretario da Academia, Henrique Monteagudo, foi o encargado de presentar a nova edición da páxina web de Primavera das Letras que, como o ano pasado, volve estar dedicado a un autor "que se presta moito para traballar co alumnado de infantil e primaria". No acto tamén tomaron a palabra o alcalde de Nigrán, Juan González, e a responsable do Equipo de Dinamización Lingüística do colexio, Vanesa Vargas. Como convidado especial acudiu igualmente o director do Instituto de Estudos Miñoráns, Xulián Maure, acompañado doutros membros desta asociación referente da cultura da comarca do Val Miñor.
Galicia consolida o seu liderado na taxa de escolaridade de 0 a 3 anos e mantense por riba do 60%, máis de 13 puntos superior á media de España, segundo os últimos datos oficiais que vén de publicar o Ministerio de Educación e Formación Profesional. Esta porcentaxe sitúa á nosa comunidade ao nivel dos países con maiores índices de benestar en Europa, como Suecia ou Dinamarca. Galicia é a comunidade autónoma onde o programa da gratuidade é máis completo, xa que ningunha outra ofrece ata 8 horas diarias e 11 meses por curso atención educativa totalmente de balde ao 100% do alumnado e en todas as escolas infantís: as públicas, as de iniciativa social e as privadas.
Os complexos hospitalarios universitarios de Santiago de Compostela e de Vigo veñen de ser seleccionados para a administración de terapias CAR-T en pacientes adultos. Esa designación formalizarase mediante resolución da Secretaría de Estado de Sanidade, logo da validación por parte do Grupo Institucional do Plan para a Abordaxe das Terapias Avanzadas no Sistema Nacional de Saúde. Galicia xa dispoñía desde 2022 de dous centros designados polo Ministerio de Sanidade para a administración de terapia CAR-T: o Complexo Hospitalario Universitario da Coruña administraba estes medicamentos avanzados en pacientes adultos e o de Santiago de Compostela en pacientes pediátricos.
