jueves, 22 de octubre de 2026
Nota de prensa del Gabinete de Comunicación de la Xunta de Galicia:
O conselleiro de Cultura, Educación e Ordenación Universitaria, Román Rodríguez, presentou os principais proxectos da temporada 2016-2017 do Centro Dramático Galego (CDG), entre os que destacou a estrea o próximo 31 de marzo da obra de Ramón María del Valle-Inclán co espectáculoMartes de Carnaval, integrado polas pezas As galas do defunto e A filla do capitán.
Román Rodríguez explicou que o paso a dominio público en 2017 da produción literaria do autor arousán posibilita legalmente a súa tradución a calquera das linguas do Estado, circunstancia tan agardada e excepcional dixo que determinará a actividade do CDG e de toda a futura escena galega.
Así, co mesmo nome da triloxía publicada en 1930, Martes de Carnaval, chegan en galego aos escenarios dúas obras cumio da época do esperpento, baixo a dirección de Tito Asorey (As galas do defunto) e de Marta Pazos (A filla do capitán); e cun elenco de dez actores e actrices que será escollido nun proceso de audición pública. Neste sentido, o conselleiro engadiu que a incorporación de Valle ao repertorio teatral galego non é a única pretensión da montaxe, senón que o CDG aspira a achegar unha nova mirada sobre a obra dun dos dramaturgos máis universais de todos os tempos.
Na presentación, que tivo lugar no Salón Teatro de Santiago, a directora do CDG, Fefa Noia, debullou o plan de actividade previsto ata outubro de 2017 nun acto ao que asistiron representantes de colectivos do sector teatral galego e moitos dos creadores e intérpretes implicados nos proxectos anunciados. Tamén participaron na comunicación destes contidos o secretario xeral de Cultura, Anxo Lorenzo, e mais o director da Axencia Galega das Industrias Culturais (Agadic), Jacobo Sutil.
Ademais da montaxe de Valle-Inclán, o Centro Dramático suma outros catro títulos que se materializarán en réxime de coprodución con compañías privadas. Deste xeito, aos xa coñecidos O conto de inverno, de W. Shakespeare, e Vida e morte de Daniel Faria, de Pablo Fidalgo, que se exhibirán en Compostela no mes de xaneiro, incorpóranselle dous novos proxectos. O primeiro deles será Os mortos daquel verán, unha lectura dramatizada sobre a novela policial de Carlos Casares con adaptación de Diego Rey e Artur Trillo, realizada xunto con Talía Teatro e a Fundación Carlos Casares, que será escenificada do 16 ao 18 de maio e coa que o CDG se suma á homenaxe do autor do Día das Letras de 2017.
Elisa e Marcela é a outra montaxe elixida, desta volta en coprodución con A Panadaría, para levar a escena un texto sobre as mulleres protagonistas do primeiro matrimonio homosexual que tivo lugar en España, concretamente na Coruña, en 1901. Gena Baamonde e Esther F. Carrodeguas son tamén coautoras deste texto, que ten planificada unha residencia artística en setembro e as representacións en outubro no Salón Teatro, xa como avance da temporada 2017-2018.
Precisamente, o plano de residencias sairá reforzado nos vindeiros meses e enfocarase, sobre todo, a artistas pertencentes ás novas xeracións escénicas. Os medios técnicos e humanos da sede escénica do CDG, o Salón Teatro, poranse a disposición do desenvolvemento destas novas propostas. Así, ademais da citada Elisa e Marcela, darase cabida a Salvador, con texto e dirección de Borja Fernández; Política de terra queimada, de Germán Gundín, Merche Pérez, Antón Piñeiro, Diego Rodríguez e Amanda Seijas; Desconexión, con dramaturxia e dirección de Santiago Cortegoso; e Tropical, de Gonçalo Guerreiro e María Torres.
Tamén a atención aos autores será un dos eixos fundamentais da actividade do CDG, xa que despois da celebración das Xornadas sobre Dramaturxia Galega entre os pasados 8 e 9 de decembro en colaboración coa asociación DramaturGA, o selo Dramaturxente, baixo o que se organizaron, manterase activado durante todo o ano para dar proxección sobre as táboas a textos escritos na actualidade en Galicia. De feito, sete dos proxectos que se realizarán no marco das residencias e das coproducións da compañía pública insírense neste programa continuo.
Os apartados de formación (coa colaboración en iniciativas pedagóxicas tanto para profesionais como para público xeral), de servizos á cidadanía (cesión de materiais e de espazos, visitas guiadas...) e de publicacións serán, así mesmo, prioritarios para o CDG.
Neste último punto destaca a nova colección editorial titulada O papel do teatro, coa que a compañía institucional recupera a publicación de pezas dramáticas. Trátase dunha serie que incluirá os textos montados polo CDG ou coa súa participación e que non tiveran sido editados con anterioridade. Ademais das obras escritas, cada entrega presentará graficamente materiais adicionais e fotografías das postas en escena. O primeiro número de O papel do teatro verá a luz a principios de xaneiro e dedicarase a Tartufo, a produción estreada o pasado setembro polo CDG sobre a obra de Molière con dirección de Carles Alfaro, actualmente en xira polos escenarios galegos. O segundo número ocuparano as dúas pezas do Proxecto Nós, compartido desde 2015 con entidades teatrais portuguesas: Bilingue, do luso José María Vieira Mendes, e O mundo persistente, do galego Fernando Epelde.
Desde o Salón Teatro, o CDG seguirá traballando para o encontro co público e como escenario multidisciplinar para a exhibición preferente dos espectáculos producidos en Galicia e para a proxección dos seus creadores. A intensa e variada carteleira que se vén ofrecendo desde o número 34 da compostelá rúa Nova continuará ao longo de 2017 cunha programación aberta ao teatro, á danza, ao audiovisual e á música, e na que todo os proxectos directos do Centro Dramático Galego terán presenza.
No que atinxe á programación externa, neste mesmo mes de decembro en curso, o Salón Teatro acollerá a montaxe Illa/Ollo, de Nasdrovia Teatro (días 16 e 17) e o concerto Cantos de poeta polo grupo Gelria (día 27); e desenvolverá o novo ciclo infantil Gran teatro para os máis pequenos, que combinará obradoiros especialmente pensados para os nenos e nenas coas funcións a cargo de Berrobambán (con Xurdefet, os días 22 e 23), Pérez & Fernández (con O poder de Amabel, os días 29 e 30) e Elefante Elegante (con A danza da choiva, o 7 e 8 de xaneiro).
O calendario de representacións continuará durante todo o ano coas últimas propostas de compañías como Talía Teatro, ilMaquinario, Teatro do Atlántico, Aporía Teatro, Teatro en Punto (que abrirá a nova sección Teatro Ob-sceno), Diego Anido ou Avento Producións. Ademais, o Salón Teatro prestarase a ser sede de eventos como o festival Escenas do Cambio da Cidade da Cultura de Galicia, o XXIII Festival Internacional de Teatro Universitario, a Mostra de Teatro Universitario de Galicia, a Mostra de Cinema Etnográfico ou o mercado Galicia Escena PRO, que organizará a Agadic do 12 ao 15 de xuño de 2017.
Fotografía: Gabinete de Comunicación de la Xunta de Galicia
O proxecto Lugopoética dá un novo paso na difusión da poesía galega coa publicación do libro Lugopoética 2026, unha obra que recolle a creación e as reflexións de doce poetas participantes na terceira edición deste ciclo literario, desenvolvido na sede da UNED de Lugo durante o primeiro semestre do ano. A publicación reúne os contidos dun programa que busca achegar a poesía á cidadanía, favorecer o encontro entre autores e lectores e contribuír á difusión da literatura en lingua galega. A iniciativa consolídase así como un espazo de diálogo arredor da palabra poética, no que conviven traxectorias consolidadas e novas voces da creación literaria.
O presidente da Xunta, Alfonso Rueda, informou de que o Consello aprobou hoxe a Estratexia Galega de Innovación Empresarial, 'con horizonte 2028 e dotada de máis de 400 millóns de euros'. O obxectivo é apoiar ao tecido produtivo para que 'a innovación forme cada día máis parte das empresas', algo fundamental para 'ser máis competitivos e non quedar atrás' nun mundo cada vez máis global e tecnolóxico. Baixo o nome Galicia, fábrica de Innovación, a nosa Comunidade contará por primeira vez cunha estratexia específica para a innovación, un conxunto de medidas cun marco común para coordinar e reforzar os instrumentos de apoio existentes e incorporar outros cunha prioridade: industrializar a innovación.
