domingo, 29 de junio de 2025
Nota de prensa de la Real Academia Galega (RAG):
A Real Academia Galega contou cuns convidados moi especiais. Trinta e dous alumnos e alumnas de infantil e primeiro ciclo de primaria do Centro Rural Agrupado Boqueixón-Vedra Neira Vilas foron recibidos polo presidente da institución, Xesús Alonso Montero, e Os Bolechas para participaren na presentación da nova colección destes populares personaxes, As miñas primeiras Letras Galegas. A serie, que conta co apoio da RAG, achegará o público infantil á vida e á obra de grandes nomes da nosa literatura que foron elixidos por esta institución para protagonizaren algún Día das Letras Galegas. E farao, como con cada entrega desta popular familia, de xeito divertido á vez que didáctico, afondando ao mesmo tempo no coñecemento da lingua propia de Galicia.
Os escolares abriron o acto recitando o poema "A fala" de Eduardo Pondal, o protagonista do primeiro libro da colección e autor da letra do Himno, que entoaron tamén no peche da presentación desde as cadeiras dos académicos de número. Xunto aos pequenos, os Bolechas e o presidente da RAG, tamén tomaron a palabra Antonio Couto Rego, editor de edicións Bolanda, o selo que publica os libros dos Bolechas desde 2012; José Manuel López Marcos, director de mercadotecnia de Caixa Rural Galega, patrocinadora da serie; e Valentín García Gómez, secretario xeral de Política Lingüística, que tamén apoia esta iniciativa. O acto contou así mesmo coa presenza de Xosé María Varela en representación da Fundación Eduardo Pondal.
O creador da familia Bolechas, Pepe Carreiro, converte en cada volume unha da obras do autor homenaxeado nun entretido conto no que os lectores van descubrindo quen é o persoeiro ao tempo que gozan dunha das aventuras típicas de Carlos, Loli, Pili, Braulio, Sonia, Tatá e Chispa. Cada relato complétase cunha breve biografía e un repaso ás principais obras da figura que protagoniza o libro.
No primeiro volume da serie, Eduardo Pondal narra a descuberta de América a través dos seus versos d'Os Eoas. Algúns dos termos máis complexos da obra son explicados ao final a xeito de sinxelo dicionario para permitir unha maior comprensión. Os seguintes números estarán dedicados a Rosalía de Castro, Curros Enríquez, Ánxel Fole e Manuel María. "É un privilexio que, xogando e pasándoo ben, poidades aprender a vida de Rosalía de Castro, de Manuel María ou de Curros Enríquez, empezando pola de Pondal", explicou o presidente da Academia ao público cativo, que aplaudiu a decisión de iniciar a colección co libro dedicado a Pondal, xa que nun mes e medio comezará o ano do centenario do seu pasamento. Xesús Alonso Montero tamén tivo palabras de recordo para Xosé Neira Vilas, o escritor e académico que lle dá nome ao colexio convidado, falecido o 27 de novembro de 2015.
Alonso Montero concluíu a súa intervención lembrándolles aos pequenos visitantes que a RAG é "a casa da palabra" e que sempre poderán recorrer a ela para resolver as súas dúbidas lingüísticas: "Comprométome a respondelas persoalmente. Este colexio de Boqueixón-Vedra quedará sempre no meu corazón".
Desde que comezaron a publicarse no ano 2000, Os Bolechas convertéronse en todo un fenómeno. Con máis de 550 títulos publicados e máis de 1.500.000 exemplares distribuídos, gozan de gran popularidade entre os máis pequenos, que seguen con paixón as súas aventuras, ben sexa a través dos seus libros, da televisión, nas propostas escénicas ou nas saídas á rúa. O seu éxito contribuíu a que toda unha xeración de galegas e galegos se achegase á cultura e á literatura en lingua galega desde os primeiros anos de vida, salientou o editor Antonio Couto Rego, que asegurou que hoxe é "un día feliz" porque se fai realidade un proxecto "longamente anhelado".
José Manuel López Marcos salientou que co apoio de Caixa Rural Galega a esta colección a entidade financeira pretende contribuír á divulgación da nosa lingua e da nosa cultura, "o reflexo dun pobo" e o mellor xeiro "de preservar" a nosa identidade.
Pola súa banda, o secretario xeral de Política Lingüística recordoulles aos escolares que na RAG se decide quen é cada ano a persoa homenaxeada no Día das Letras Galegas e destacou que Os Bolechas teñen "unha identificación moi especial", o feito de falaren sempre galego, e animounos a seguir o seu exemplo.
Galicia reforza por terceiro curso consecutivo o seu liderado na taxa de escolaridade de 0 a 3 anos e achégase ao 65 %, máis de 15 puntos por riba da media de España, segundo os últimos datos oficiais que vén de publicar hoxe o Ministerio de Educación, Formación Profesional e Deportes. Deste xeito, Galicia segue sendo a comunidade autónoma onde máis familias poden acudir a unha escola infantil totalmente gratuíta. As cifras oficiais revelan que Galicia rexistrou no curso 2024-2025 unha taxa do 64,3 % de escolarización, máis de catro puntos por riba do 60,6 % acadado no período anterior. Esta porcentaxe mantén á comunidade ao nivel dos países con maiores índices de benestar en Europa, como Suecia ou Dinamarca.
No marco do Plan de Actuacións da Xunta de Galicia fronte aos posibles efectos das altas temperaturas sobre a saúde, vénse de activar o nivel 1 de alerta a diversas áreas da comunidade autónoma por episodio de calor. Meteogalicia informa que a partir da xornada do venres 27, as altas presións volverán localizarse ao norte da península Ibérica, achegando unha masa de aire moi cálida de orixe norteafricana. Isto fará que as temperaturas experimenten significativos ascensos, tanto nos valores mínimos como nos máximos. Este ascenso de temperaturas comezará a notarse desde ese mesmo día, cando en moitos puntos de Galicia se superarán os 30ºC, e mesmo os 35ºC, en puntos do interior.
