viernes, 23 de octubre de 2026
Nota de prensa del Gabinete de Comunicación de la Xunta de Galicia:
A longametraxe galega Sicixia, do realizador Ignacio Vilar, inicia o seu percorrido polo circuíto comercial español coa súa estrea en 31 salas de 19 localidades galegas e cinco do resto de España (Madrid, San Feliu de Llobregat, Tarragona, Valencia e Xixón). A película de Vía Láctea Filmes é un dos títulos subvencionados pola Consellería de Cultura e Educación a través da convocatoria anual de axudas públicas da Axencia Galega das Industrias Culturais (Agadic) á produción e coprodución audiovisual.
O director da Agadic, Jacobo Sutil, participou hoxe en Carballo na presentación desta estrea xunto con Evencio Ferreiro, alcalde de Carballo; José Manuel López Varela, alcalde da Laracha; e unha representación do equipo de Sicixia encabezada polo seu director, Ignacio Vilar, e o actor Monti Castiñeiras.
Na súa intervención, Jacobo Sutil subliñou que se trata dunha produción en galego realizada por un equipo técnico e artístico integramente galego. Neste sentido, destacou que Sicixia dá conta da valía dos profesionais que integran a nosa industria audiovisual e do potencial de Galicia como escenario de rodaxe, ademais de poñer en valor a paisaxe, a cultura e as tradicións galegas diante do gran público.
A Costa da Morte, a súa paisaxe, as súas xentes e as súas costumes son parte importante da cultura e da historia de Galicia; conforman un acervo cultural que nos identifica, nos distingue e nos prestixia como pobo, máis aínda cando isto se fai por medio do cinema para dar como resultado un produto capaz de competir en condicións de igualdade en calquera mercado internacional, sinalou.
De feito, a primeira proxección internacional de Sicixia tivo lugar a primeiros de outubro na vixésimo primeira edición do Festival Cine España de Toulouse (Francia), onde Marta Lado obtivo o premio á mellor interpretación feminina, e acaba de preestrearse en París e de participar no Festival Internacional de Cine de Xixón.
Sutil explicou que o proxecto acometido por Vía Láctea Filmes tras o éxito acadado con A esmorga contou para a súa materialización cunha achega de 260.000 euros a través da convocatoria de 2014 de axudas da Agadic á produción audiovisual na modalidade de longametraxes cinematográficas.
Igualdade de xénero
Sicixia, que toma como título o termo astronómico que define o momento no que se aliñan os centros do Sol, da Terra e da Lúa, mestura ficción e realidade para retratar o patrimonio paisaxístico e cultural da Costa da Morte. Nesta historia, a través da que tamén se fomenta a igualdade de xénero, Monti Castiñeiras dá vida a un enxeñeiro que recibe o encargo de gravar os singulares sons da Costa da Morte. Alí coñece a unha guía local, interpretada por Marta Lado, que lle axudará a se mergullar na idiosincrasia desta zona de Galicia. No reparto figuran tamén Arantza Villar, Artur Trillo, Daniel Trillo e Tamara Canosa.
A nova película de Ignacio Vilar estréase hoxe en diferentes salas de A Coruña, A Estrada, A Rúa de Valdeorras, Caldas de Reis, Carballo, Cee, Ferrol, Lugo, Madrid, Marín, Monforte, Narón, O Barco de Valdeorras, Ourense, Pontevedra, Ribeira, Santiago de Compostela, Sant Feliu de Llobregat, Tarragona, Valencia, Vilagarcía de Arousa, Vigo, Viveiro e Xixón.
A primeira etapa da xira de A Gaivota, ensaio aberto desenvolveuse do 12 ao 15 de outubro na sala Atahualpa do Teatro El Galpón de Montevideo, en coprodución con esta institución e no marco do Festival Internacional de Artes Escénicas de Uruguai, FIDAE. O programa comprendeu sete representacións nas que Déborah Vukuić compartiu escenario con Camila Durán e Claudia Trecu, que entraron no lugar das actrices galegas Uxía Suevos e Mercedes Castro. A magnífica resposta do público uruguaio contou cunha destacada presenza da comunidade galega, que converteu as funcións nun espazo de encontro arredor da lingua e da creación escénica de Galicia. Esta acollida precede a chegada á Arxentina, onde Déborah Vukuić compartirá escenario coas actrices locais Eugenia Alonso e Carmela Rivero.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
