viernes, 23 de octubre de 2026
Nota de prensa de la Asociación de Actores e Actrices de Galicia (AAAG):
A Asociación de Actores e Actrices de Galicia (AAAG) e o Festival Cineuropa lembrarán a actriz María Casares, falecida o 22 de novembro de 1996, no vixésimo aniversario do seu pasamento cun ciclo especial: Vinte anos sen María Casares. O ciclo celebrarase no Salón Teatro o martes 22 de novembro dende ás 16.00 horas e incluíra, entre o martes e o mércores, as proxeccións das películas francesas Le Testament d'Orphée (1960), de Jean Cocteau, Les enfants du Paradis (1942), de Marcel Carné, e un pase, grazas á colaboración de CRTVE, da entrevista a María Casares no histórico programa de TVE A fondo. Ademais, o ciclo incluirá un coloquio ao redor da figura da histórica actriz nacida da Coruña.
Con esta programación especial, a AAAG e Cineuropa queren renderlle tributo á unha intérprete universal, unha actriz que representa un dos grandes referentes teatrais intelectuais da Francia do século XX. Así o explicaron hoxe en rolda de prensa no Concello de Santiago a vicepresidenta da AAAG, Mabel Rivera; o director de Cineuropa, José Luis Losa; a concelleira de Igualdade, Desenvolvemento Económico e Turismo, Marta Lois, e a vicepresidenta da Deputación da Coruña, Goretti Sanmartín. Rivera, durante a súa intervención, lembrou o compromiso que asumiu a AAAG neste 2016, aproveitando o vixésimo cabodano da actriz, polo cal pretende reivindicar e difundir dentro da sociedade unha figura poliédrica dende tres perspectivas esenciais: a de muller comprometida, a de actriz universal e a de exiliada.
O ciclo Vinte anos sen María Casares comezará o martes ás 16.00 horas no Salón Teatro, coa proxección da entrevista á actriz realizada por Soler Serrano no histórico programa A fondo da TVE. Acto seguido, ás 17:15, proxectarase Le Testament d'Orphée (O testamento de Orfeo), fita de 1960 dirixida por Jean Cocteau e da que María Casares forma parte do seu elenco.
A xornada rematará ás 19.00 horas cun coloquio especial ao redor da figura de María Casares. Presentado pola actriz Mabel Rivera, a mesa redonda contará coa participación de María Lopo, investigadora e autora da biografía da actriz O tempo das Mareas (Consello da Cultura Galega, 2016); José Luis Castro de Paz, profesor da Universidade de Santiago de Compostela e historiador do cine, e Sabela Hermida, actriz e investigadora da figura teatral de María Casares.
Xa o mércores 23 de novembro, o ciclo de María Casares finalizará ás 16:45 no Salón Teatro coa proxección de Les enfants du paradis, película de Marcel Carné de 1942. Esta fita, considerada un dos grandes títulos do cine francés, supuxo o debut cinematográfico de María Casares. Todas as sesións son de balde.
O ciclo de Cineuropa centrado en María Casares complétase ao longo da semana na Radio Galega, cunha colaboración da Asociación de Actores e Actrices de Galicia (AAAG) co programa Diario Cultural, que reproducirá fragmentos da entrevista que lle concedeu María Casares en 1995 á Televisión de Galicia e emitirá diferentes poemas que sempre acompañaron a actriz no seu exilio, lidos na voz de actrices como Isabel Naveira, María Mera, Sabela Gago ou Diana González.
Nace na Coruña o 21 de novembro de 1922, filla de Santiago Casares Quiroga, presidente do Goberno da II República, e Gloria Pérez Corrales, muller de familia obreira. En novembro de 1936, tras exercer como enfermeira durante os primeiros meses da Guerra Civil, exíliase en París. Alí, implícase coa Resistencia contra os Nazis, estuda no Conservatorio e debuta no Teatro Les Mathurins en 1942. A partir dese ano, Casares traballou cos directores teatrais e cinematográficos franceses máis importantes do seu tempo até converterse nun referente teatral do século XX. Casares faleceu o 22 de novembro de 1996.
A primeira etapa da xira de A Gaivota, ensaio aberto desenvolveuse do 12 ao 15 de outubro na sala Atahualpa do Teatro El Galpón de Montevideo, en coprodución con esta institución e no marco do Festival Internacional de Artes Escénicas de Uruguai, FIDAE. O programa comprendeu sete representacións nas que Déborah Vukuić compartiu escenario con Camila Durán e Claudia Trecu, que entraron no lugar das actrices galegas Uxía Suevos e Mercedes Castro. A magnífica resposta do público uruguaio contou cunha destacada presenza da comunidade galega, que converteu as funcións nun espazo de encontro arredor da lingua e da creación escénica de Galicia. Esta acollida precede a chegada á Arxentina, onde Déborah Vukuić compartirá escenario coas actrices locais Eugenia Alonso e Carmela Rivero.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
