domingo, 8 de noviembre de 2026
Nota de prensa del Gabinete de Comunicación de CC.OO.-Galicia:
O Sindicato Nacional de Comisións Obreiras de Galicia (CCOO) e o Partido dos Socialistas de Galicia (PSdeG) instan a Xunta a clarificar nos orzamentos as promesas efectuadas por Alberto Núñez Feijóo no seu discurso de investidura como presidente. Así o afirmaron os responsables de ambas as dúas organizacións após a reunión que mantiveron na sede nacional do sindicato as representacións de CCOO e do grupo parlamentario socialista.
A delegación socialista integrárona o portavoz do grupo parlamentario, Xoaquín Fernández Leiceaga, a viceportavoz, Noela Blanco, e mais Abel Losada, portavoz de Orzamentos, Industria e I+D. Recibíronos o secretario xeral de CCOO, Xosé Manuel Sánchez Aguión, a secretaria de Política Social, Adela Poisa, e o secretario de Acción Sindical, Xesús Castro.
En declaracións posteriores aos medios de comunicación, o secretario xeral de CCOO explicou que a xuntanza, a primeira das dúas organizacións nesta nova lexislatura, serviu para achegar posicións en asuntos «clave» da vida económica, política e social de Galicia.
Xosé Manuel Sánchez Aguión asegurou que na última lexislatura se perderon postos de traballo, ingresos e calidade de vida, ao tempo que os recortes prexudicaron os servizos públicos. Canto á nova etapa, «veremos se a xeración de riqueza asociada á incipiente recuperación económica se reparte equitativamente ou, pola contra, se acentúan as desigualdades», apuntou.
Segundo o secretario xeral de CCOO, actualmente hai duascentas mil persoas en Galicia que «queren traballar e non poden», persoas que «precisan recursos, non discursos». Ademais, apelou a que a Administración pública desempeñe un papel dinamizador da economía e o emprego, comezando pola recuperación dos postos de traballo destruídos no sector público nos últimos anos, o que ademais redundará nunha mellor calidade dos servizos que se presten.
O Executivo continuísta de Núñez Feijóo foi un dos asuntos polos que, tanto a Aguión como a Leiceaga, se lles preguntou ao remate da xuntanza. O dirixente sindical afirmou que se trata dun equipo de «continuidade absoluta», algo que «non casa ben» cos cambios prometidos polo presidente da Xunta. Lamentou tamén que Feijóo renunciara a recuperar para o organigrama da Xunta a Consellaría de Traballo, con «competencias transversais» en todo o relativo a esta área. Pola súa parte, o voceiro socialista apuntou que a presentación dun Goberno sen novidades «é toda unha declaración de intencións. Non hai autocrítica». Na súa opinión, a «nova fase» anunciada por Feijóo terá «difícil encaixe» cos mesmos actores e instrumentos.
Tanto Aguión como Leiceaga chamaron a agardar á presentación dos orzamentos da Xunta para ver se as promesas formuladas por Feijóo se traducen en «medidas concretas con recursos concretos» ou se, pola contra, se trata dun «brinde ao sol». Neste punto, o secretario xeral de CCOO amosouse partidario da Lei de emprego anunciada polo presidente, pero «mal comezamos», dixo, se se renuncia a recuperar a Consellaría de Traballo. Ademais, «falta comprobar se a dita lei terá reflexo nos orzamentos e con que instrumentos contará», concluíu Aguión.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
