sábado, 13 de diciembre de 2025
Nota de prensa del Gabinete de Comunicación de la Xunta de Galicia:
O hotel Vidago Palace, en Portugal, acolleu a presentación da serie televisiva galego-portuguesa que leva o seu nome e onde se desenvolve unha parte da rodaxe. Un amplo equipo dos dous países grava desde inicios de mes esta coprodución da compañía galega Portocabo e a lusa HOP Filmes, en colaboración coa Corporación Radio e Televisión de Galicia (CRTVG) e a Rádio e Televisão de Portugal (RTP). Vidago Palace conta, ademais, cunha subvención da Consellería de Cultura e Educación a través do programa de axudas ao sector audiovisual convocado anualmente pola Axencia Galega das Industrias Culturais (Agadic).
O director da Agadic, Jacobo Sutil, participou nesta presentación xunto coa directora de TVG, Rosa Vilas; o tenente de alcalde de Verín, Diego Lourenzo; e os representantes de diferentes entidades portuguesas. Na súa intervención, incidiu na relevancia deste proxecto como exemplo do camiño que se debe seguir nas relacións entre as industrias audiovisuais de ambas as beiras do Miño. De feito, a posta en marcha da serie recibiu o impulso definitivo a raíz da participación de Portocabo e HOP Filmes no I Encontro de Coprodución Audiovisual Portugal-Galicia, promovido pola Axencia Galega das Industrias Culturais e o Instituto do Cinema e do Audiovisual (ICA) do país veciño ao abeiro da pasada edición do Ourense Film Festival (Ouff).
Segundo explicou Sutil, a segunda edición deste foro bilateral terá lugar este mesmo sábado 29, de novo no marco do festival ourensán, co obxectivo de que as compañías galegas e lusas continúen estreitando lazos cara á posta en marcha de novos proxectos comúns como Vidago Palace.
Este é, así mesmo, un dos 16 novos títulos apoiados pola Agadic a través da última convocatoria se subvencións a producións e coproducións audiovisuais. Jacobo Sutil explicou que para acadar esta axuda, concedida na modalidade de longametraxes e miniseries de televisión, a proposta superou un proceso de concorrencia competitiva que tivo en conta aspectos relacionados coa súa calidade obxectiva, a súa relevancia cultural, a súa achega ao sector e á promoción do talento audiovisual galego e mesmo a súa viabilidade económica e comercial.
A representación artística e técnica de ambos os países neste traballo é practicamente paritaria, e tanto os espectadores galegos como os portugueses poderán gozar do seu resultado a partir do ano que vén coa súa emisión, en formato de mini-serie, a través de TVG e RTP. Así, a rodaxe desenvolverase ata o 25 de novembro en dúas localizacións principais: o propio hotel Vidago Palace, baixo a dirección do portugués Enrique Oliveira, e as terras fronteirizas do Couto Mixto, en Verín, co galego Jorge Coira como responsable de dirección desta segunda unidade.
Coira é tamén o xefe de montaxe e coguionista -xunto co propio Olveira, Araceli Gonda e Manuel Darriba- deste drama romántico, ambientado en agosto de 1936 arredor da historia de amor entre unha aristócrata portuguesa e o fillo do conserxe galego do hotel, co estalido da Guerra Civil como pano de fondo. No reparto de 30 actores e actrices, atópanse, así mesmo, os galegos David Seijo, Antonio Mourelos, Eva Fernández, David Novas, David Amor, Sheyla Fariña e José Antonio Touriñán, entre outros. Tamén figuran no equipo Ana Míguez e Alfonso Blanco na produción, Xavi Font na banda sonora e Antonio Pereira na dirección de arte.
Fotografía: CRTVG
Os Concertos do Xacobeo da Xunta de Galicia achegarán a mellor música internacional do momento a Santiago de Compostela cunha nova edición de O Gozo Festival. Maroon 5, Martin Garrix, Danny Ocean, Rita Ora e Miriam Rodríguez son as primeiras confirmacións do festival, que presentarán os seus directos no Monte do Gozo compostelán o sábado 11 de xullo de 2026. O Gozo Fest conta co apoio da Xunta de Galicia a través da Axencia Turismo de Galicia, no marco dos Concertos do Xacobeo. En 2026, O Gozo Festival celebrará a súa cuarta edición cun line-up de luxo. O proxecto O Gozo Festival, que naceu en 2023 co apoio da Xunta de Galicia a través da Axencia Turismo de Galicia, no marco de Concertos do Xacobeo, consolidouse na súa terceira edición, celebrada en 2025, cun éxito rotundo de crítica e público.
O presidente da Xunta, Alfonso Rueda, defendeu esta mañá, na súa condición de presidente da delegación española do Comité Europeo das Rexións (CdR), unha maior cogobernanza das rexións na planificación e xestión dos fondos europeos e máis recursos para o sector primario. Así o destacou logo dunha reunión organizada polo Executivo galego entre os representantes españois tanto das comunidades autónomas como das entidades locais do CdR con eurodeputados españois e o embaixador representante permanente de España ante a Unión Europea, Marcos Alonso, 'para poñer en común as intencións e o noso plantexamento' de cara á negociación do novo Marco Financieiro Plurianual 2028-2034.
