viernes, 14 de agosto de 2026
Nota de prensa del Gabinete de Comunicación del BNG:
A portavoz nacional, Ana Pontón, encabezou o acto simbólico en defensa da transferencia e rescate da AP9 organizado polo BNG ao pé da Ponte de Rande e anunciou unha ofensiva institucional e social para lograr a xestión para Galiza desta vía vertebral e acabar coa estafa legalizada das peaxes máis caras do Estado.
Dentro desa ofensiva, a proposta de Pontón aos líderes de todas as forzas políticas para facer unha fronte común dunha reivindicación unánime do Parlamento, expresada nun escrito remitido a Feijóo, Villares e Leiceaga, ante a intención do goberno de Rajoy de vetar no Congreso a transferencia e rescate da autoestrada con argumentos falsos que supoñen un agravio e un menosprezo a Galiza.
O Goberno de Rajoy alega que a AP9 conecta con Portugal cando a vía de conexión co país veciño é a A55. Primeiro obstáculo superado porque é falso, indicaba Pontón, quen tamén botaba por terra o argumento económico.
Preguntámonos como é posible que o Goberno central teña 8.000 millóns de euros para rescatar unhas ruinosas radiais polas que non circulan ninguén en Madrid e diga que ten cero euros para rescatar de peaxes a AP9 que é a autoestrada que máis beneficios da de todo o Estado?, interpelaba. Resulta incomprensible e demostra que a corrupción no PP non só esta só en B na trama Gürtel senón tamén en A través do BOE.
Pontón censuraba o silencio do habitualmente locuaz Feijóo ante un asunto de país ao tempo que cualificou de moi decepciónante a posición adoptada polos grupos da Mesa do Congreso. Como é posible que se siga enredando solicitando información e non acepte como democrático que se debata no Congreso unha lei aprobada por unanimidade do Parlamento?, criticaba.
A portavoz nacional denuncia que se trata dunha discriminación e pon o acento ata que punto a submisión de Feijóo a Madrid está levando a Galiza á irrelevancia política, a que non nos teñan ningún tipo de respecto cuestionando incluso que unha lei aprobada polo noso parlamento poda ser debatida con normalidade ao Congreso.
O BNG non acepta o veto a esta transferencia e vai poñer en marcha unha ofensiva institucional e social, porque a cidadanía deste país ten dereito a acabar cunhas peaxes que son unha estafa e temos dereito tamén a xestionar a AP9 desde Galiza, concluíu.
No acto participaron cargos institucionais nacionalistas, como o rexedor de Pontevedra, a alcaldesa de Moaña, o alcalde das Neves, portavoces municipais da Coruña e Santiago e outros responsables municipais dos concellos situados no Eixo Atlántico, así como deputados electos como Olalla Rodil e Luís Bará.
Fotografía: Gabinete de Comunicación del BNG
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
