viernes, 23 de octubre de 2026
Nota de prensa del Gabinete de Comunicación de la Xunta de Galicia:
A Fundación Pazo de Mos e a Axencia Galega das Industrias Culturais (Agadic) colaboran no desenvolvemento da Mostra de Cine Galego de Mos, que terá lugar no auditorio deste espazo pontevedrés do 16 de outubro ao 26 de novembro.
Maimiño e o espello máxico, Os fenómenos, A praia dos afogados, Inevitable e Lobos sucios son os cinco títulos que conforman esta carteleira, inserida á súa vez no programa de actividades culturais promovido a través do protocolo de colaboración que manteñen este ano a Fundación Pazo de Mos e a Consellería de Cultura, Educación e Ordenación Universitaria.
A súa oferta audiovisual arranca co filme de animación Maimiño e o espello máxico, coprodución cubano-galega impulsada pola compañía compostelá Ficción Producciones e dirixida polo cubano Ernesto Padrón. Esta adaptación libre do popular conto de Charles Perrault exhibirase no auditorio mosense o vindeiro domingo 16, ás 18.00 horas. O resto do programa concentrarase nos sábados do mes de novembro, durante os que se proxectarán outras catro producións con participación galega: Os fenómenos, de Alfonso Zarauza (día 5); A praia dos afogados, de Gerardo Herrero (día 12); Inevitable, de Jorge Algora (día 19); e Lobos sucios, de Simón Casal (día 26). Estes catro pases están programados para as 22.15 horas e, do mesmo xeito có do vindeiro domingo, serán de entrada libre ata completar a capacidade da sala.
Con esta Mostra de Cine Galego péchase a programación cultural que se vén desenvolvendo desde o pasado mes de agosto e dentro da que se celebraron, así mesmo, os concertos de Treixadura, Tiruleque e a Galicia Fiddle Orquestra, ademais de contacontos na rúa para poñer en valor a oralidade en lingua galega.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
