jueves, 16 de abril de 2026
Nota de prensa del Gabinete de Comunicación de Santiago de Compostela:
O alcalde recibiu no Pazo de Raxoi a un grupo de representantes da Plataforma Vítimas do Tren Alvia 04155. O colectivo quixo agradecerlle a Martiño Noriega o feito de que o de Santiago fora o primeiro Concello en aceptar a moción que insta ao Goberno do Estado a abrir unha comisión de investigación sobre o accidente ferroviario de Angrois.
Este texto recibira luz verde no pleno ordinario do mes de abril, cos votos a favor de Compostela Aberta e BNG, e co apoio do PSOE a algúns dos puntos da moción. O PP ausentárase daquela sesión e non chegara a votar a proposta. A moción instaba ao Congreso a constituír unha comisión de investigación que esclarecera o acontecido o 24 de xullo de 2013, e ao Goberno do Estado a crear unha comisión de persoas técnicas para avaliar o accidente no que morreran 80 persoas.
No encontro, o alcalde reiterou o total apoio do conxunto da Corporación ás vítimas do Alvia, e defendeu que ademais das responsabilidades individuais no accidente "hai unhas responsabilidades colectivas que non foron depuradas nun pacto de silencio indigno". Martiño Noriega recoñeceu que Compostela "ten unha ferida aberta co sinistro do Alvia e é absolutamente solidaria coas reivindicacións da plataforma de vítimas, porque a ferida non se pechará ata que as responsabilidades colectivas non sexan depuradas". Na reunión, a Plataforma de Vítimas estivo representada por Esperanza Fernández, Álvaro García, Juan Besada, José Antonio Gayoso, Asunción Ferreiro e Jesús Naveiras.
A Mostra Internacional de Teatro Cómico e Festivo de Cangas acordou conceder o Premio Xiria ao Labor Teatral 2026 ao actor Antonio Durán Morris (Vigo, 1959). A organización da Mostra outorga este galardón en recoñecemento á súa dilatada traxectoria profesional, tanto no eido da comedia como do drama, 'cunha capacidade creativa excepcional que lle permite interpretar personaxes complexos ou populares e conmover aos públicos máis diversos'. O actor recibe cunha 'alegría tremenda' este galardón, 'sobre todo vindo de xente que comparte o camiño que eu recorrín'.
A débeda pública de Galicia representa só 3,52 % do total da débeda do conxunto das comunidades, o mellor dato de toda a serie histórica, que comeza no ano 1994. Ademais, a ratio de débeda PIB galega sitúase no 13,9 %, fronte ao 20,2 % da media autonómica e por baixo das previsións iniciais contidas nos Orzamentos 2025, que eran do 14,1 %. Tamén desde o ano 2020 Galicia formaliza unha parte cada vez máis significativa do seu endebedamento en formato sustentable, a través de préstamos e emisións de bonos.
