lunes, 27 de octubre de 2025
Nota de prensa del Gabinete de Comunicación de la Xunta de Galicia:
O programa Sinais en curto, dedicado ao novo cinema feito en Galicia, abre o mércores 1 de xuño, ás 18.00 horas, a carteleira que o Centro Galego de Artes da Imaxe (CGAI-Filmoteca de Galicia) despregará esta semana como unha das sedes da (S8) Mostra de Cinema Periférico. A sétima edición deste festival, un dos seis eventos audiovisuais subvencionados este ano pola Consellería de Cultura a través da Axencia Galega das Industrias Culturais (Agadic), arranca esta mesma noite no Teatro Rosalía Castro cunha gala arredor de O acoirazado Potemkin e continuará ata o domingo 5 cunha intensa programación en diferentes espazos da cidade.
No caso do CGAI, o cinema galego protagoniza a primeira das nove sesións da (S8) cunha escolma de curtametraxes, entre as que se inclúen pezas producidas dentro da segunda edición do Chanfaina Lab, celebrada en setembro de 2015 en San Sadurniño. Esta foi unha experiencia de creación audiovisual colectiva na que os participantes filmaron cadansúa curtametraxe durante unha fin de semana, con absoluta liberdade sobre o tema e o tratamento audiovisual. Neste sentido, a (S8) recupera os traballos de Natalia Porca (Materia Prima), Mar García (Beleza do verán), Diana Toucedo (Homes), Alberte Branco (Trazos), Lucía Vilela (Toxos e flores) e Miguel Mariño (O tempo da mazá). Ademais, presentaranse as curtas doutros tres realizadores: Xurxo Chirro (Jeannette) gañadora do premio á mellor curtametraxe do Ficic 2016 en Arxentina, Gonzalo E. Veloso (Subida ao cerro) e Borja Santomé Rodríguez (Historia cerebro).
A segunda sesión do mércores, ás 20.30 horas, dedicarase á obra de Germaine Dulac, pioneira francesa e referente do impresionismo cinematográfico, que é un dos eixos temáticos da sétima edición deste encontro centrado nas vangardas audiovisuais. No CGAI exhibiranse as versións restauradas de Thèmes et Variations (1928) e Étude Cinématographique sur une Arabesque (1929), así como LInvitation au voyage (1927) e Disque 957 (1928).
Por outra banda, o festival traerá á Coruña tres mestres internacionais, dos que a filmoteca galega ofrecerá diferentes sesións especiais. É o caso do estadounidense Saul Levine (xoves 2, ás 18.00 h, e sábado 4, ás 20.30 h), quen desde finais dos sesenta emprega como ferramenta fundamental o Súper 8, xuntando o chamado cine diarístico coa busca formal e a militancia política.
No caso dos outros dous protagonistas, ambos son creadores ligados á mítica London Filmmakers Co-op. Dunha banda, o veterano William Raban (xoves 2, ás 20.30 h), quen ademais impartirá o sábado 4 no auditorio de Afundación unha clase maxistral sobre Tempo e materialidade no cine, que incluirá o filme-performance Take Measure. Doutra, Nicky Hamlyn (venres 3, ás 18.00 h), quen estreará o sábado na Fundación Luís Seoane outro filme-performance feito especificamente para o festival.
O Centro Galego das Artes da Imaxe tamén acollerá o venres ás 11.30 horas a conferencia e as proxeccións do artista catalán Eugeni Bonet, quen estará acompañado por Albert Alcoz, e ás 20.30 horas a presentación da nova longametraxe documental de Andrés Duque, Oleg y las raras artes. O sábado, ás 17.00 horas, ofrecerase unha nova sesión de Stan Brakhage, unha das principais figuras do cinema experimental do século XX que vén sendo obxecto dunha minuciosa retrospectiva por parte do CGAI dentro da súa sección Desencadres.
Todas as sesións da (S8) Mostra de Cinema Periférico na sala se proxeccións da Filmoteca de Galicia son de acceso libre ata completar a capacidade.
Fotografía: Gabinete de Comunicación de la Xunta de Galicia
O Centro Dramático Galego colgará de novo o cartel de entradas esgotadas nas tres últimas funcións do seu espectáculo A serie clopen esta fin de semana no Salón Teatro de Santiago de Compostela, onde terá sido visto por arredor de 5500 persoas desde a súa estrea o pasado 11 de setembro. Tras os 33 pases ofrecidos na sede da compañía da Xunta, tamén completando as butacas dispoñibles en varias ocasións, o espectáculo iniciará a finais de mes unha xira que o levará a outros cinco escenarios de Galicia e Portugal. Así, a proposta dirixida por Pablo Reboleiro representarase o 30 de outubro no Teatro Académico de Gil Vicente de Coímbra como parte da programación da Mostra Galiza Coimbra 2025, organizada polos colectivos Cena Lusófona e A Escola da Noite e que conta co apoio económico da Consellería de Cultura, Lingua e Xuventude para ofrecer unha escolma de producións escénicas galegas, entre outras moitas actividades artísticas e formativas.
As empresas galegas que empregan Intelixencia artificial son xa o 15,7%, tras experimentar un crecemento do 51,1% no último ano. Crece tamén o uso do Cloud Computing, que pasou do 31,5% ao 38,2% no mesmo período de tempo. Son datos da enquisa sobre o uso das TIC e do comercio electrónico nas empresas 2024/2025, publicada hoxe polo Instituto Nacional de Estatística (INE) e que constatan o crecemento sostido das tecnoloxías innovadoras no tecido produtivo galego. Outro dos indicadores do grao de dixitalización das empresas galegas é a incorporación dos especialistas TIC. O 13,1% das empresas de máis de 10 empregados conta con este perfil profesional, un 4% máis no último ano, o que a converte a Galicia na novena Comunidade Autónoma con máis proporción de especialistas TIC no tecido empresarial.
