Notas de prensa

O Arquivo do Reino de Galicia recupera as fontes orixinais da causa contra Romasanta, o home lobo

O Arquivo do Reino de Galicia recupera nunha publicación as fontes orixinais da causa contra Manuel Blanco Romasanta, coñecido como “o home lobo”, acusado no século XIX de varios asasinatos. O volume, que foi presentado polo secretario xeral de Cultura, Anxo Lorenzo; polo presidente do Tribunal Superior de Xustiza de Galicia (TSXG), Miguel �ngel Cadenas; e pola directora do arquivo, Carmen Prieto, contén unha edición facsimilar da reseña da causa publicada en 1859, conservada no Arquivo do Reino de Galicia, na que o avogado Manuel Rúa Figueroa, que se encargou da defensa do reo, ofrece dun xeito resumido e cunha visión particular as partes máis representativas do proceso.

Baixo o título ‘Causa contra Manuel Blanco “o home lobo”. Expediente xudicial da Audiencia Territorial da Coruña’, a obra favorece o acceso das persoas interesadas ás fontes orixinais desta causa formada no xulgado de Allariz, que concluíu coa condena a cadea perpetua de Romasanta, malia que inicialmente fora condenado a morte. Para iso, ademais da reseña da causa, o volume tamén incorpora un CD coa copia dixitalizada do expediente xudicial orixinal completo da Audiencia Territorial da Coruña, xunto cun texto do presidente do TSXG sobre o procedemento penal do século XIX.

“A partir desta obra achegámonos á relevancia que tivo na súa época este acontecemento, que é o único caso coñecido en España dun proceso xudicial aberto a unha persoa por licantropía”, afirmou o secretario xeral, quen tamén fixo referencia ao caso como fonte temática de diversos traballos, como o discurso de ingreso de Vicente Risco na Real Academia Galega, en 1929.

Divulgar e poñer en valor o patrimonio documental

O titular de Cultura enmarcou a publicación da obra no interese de dar a coñecer e poñer en valor o patrimonio cultural galego, obxectivos que, segundo explicou, comparten o resto de actividades programadas polos arquivos da Xunta de Galicia para conmemorar o Día Internacional dos Arquivos, que se celebra o 9 de xuño, coincidindo coa data da creación do Consello Internacional de Arquivos, en 1948.

Conmemoración do Día dos Arquivos

Unha das iniciativas centrais da celebración é a exposición ‘Memorias de familia: O fondo Vilariño Pintos no Arquivo de Galicia’, que se inaugura mañá martes, ás 13 horas, no Arquivo de Galicia, na Cidade da Cultura. Realizada a partir do primeiro arquivo privado que ingresou no Arquivo de Galicia, doado en 2010 á Xunta de Galicia polos irmáns Vilariño Pintos, de Santiago de Compostela, a exposición amosará desde o 9 de xuño ao 9 de setembro unha selección de documentos que se acompañan de fotografías cedidas pola familia para a ocasión, xunto con obxectos persoais e reproducións de documentos gráficos e en imaxes sobre a capital de Galicia, procedentes do Arquivo Histórico Universitario e do Museo do Pobo Galego.

O legado franciscano en Ourense

Pola tarde, ás 19:30 horas, o Arquivo Histórico Provincial de Ourense tamén inaugurará a exposición documental ‘O legado de Asís: franciscanos e clarisas en Ourense’. A mostra baséase na divulgación do patrimonio documental herdado dos conventos ourensáns da orde franciscana, un legado pouco coñecido que permite reconstruír o pasado destas comunidades e recuperar a memoria da súa dilatada presenza na cidade de Ourense, nas vilas de Allariz, Monterrei e Ribadavia e no lugar de Trandeiras (Xinzo de Limia).

Axenda de Cultura de Galicia

Xornadas de portas abertas e visitas guiadas, conferencias e obradoiros completan as actividades conmemorativas nos arquivos históricos provinciais de Lugo e de Pontevedra, así como nos arquivos administrativos da Xunta de Galicia, que se poden consultar na Axenda de Cultura de Galicia, en www.cultura.gal