martes, 22 de julio de 2025
A literatura galega estará presente no concerto que ofrecen en Londres os BBC Singers, dedicado á música iberoamericana, a través dos versos de Rosalía de Castro. O coro da radio pública británica interpretará na igrexa de Saint Paul en Knightsbridge unha obra do compositor Daniel Saleeb, cuxa letra incorpora os versos do poema As de cantar, de Cantares gallegos.
Os versos de Rosalía de Castro soarán en galego e tamén en inglés, na tradución inglesa de Erín Moure que coeditaron en 2013 a Consellería de Cultura, Educación e Ordenación Universitaria e Small Station Press. A Radio 3 británica emitirá o concerto, que se poderá escoitar en directo a partir das 19:30 hora local (20:30 horas en Galicia) ou en diferido durante unha semana despois do concerto en http://www.bbc.co.uk/programmes/b04xrzd7 [nova venta] .
O programa do concerto, no que o coro da BBC estará acompañado polo guitarrista escocés Sean Shibe, tamén inclúe obras, entre outros, de Manuel de Falla e de Héitor Villa-Lobos. Arredor deste compositor, o departamento que dirixe Xesús Vázquez Abad tamén apoiara en 2013 o proxecto musical Villa-Lobos. A New Way, unha lectura en clave de jazz do artista brasileiro xurdida da colaboración entre o profesor, compositor e intérprete Alberto Conde coa soprano Carmen Durán, xunto cos músicos Nirankar Khalsa, Kin García e Miguel Cabana, de Alberto Conde Atlantic Trío.
Referentes da literatura galega en inglés
A Consellería e Small Station Press coeditaron en 2013 GalicianSongs, a primeira edición integramente en inglés da obra de Rosalía de Castro. O volume veu a luz en Galician Classics, unha colección promovida pola Secretaría Xeral de Cultura e Small Station Press de clásicos en galego para dar a coñecer no exterior a literatura galega, no marco da cal xa se publicaron outras obras de referencia da literatura galega traducidas ao inglés, como son Herba aquí ou acolá, de Álvaro Cunqueiro; Longa noite de pedra, de Celso Emilio Ferreiro; unha escolma poética de Lois Pereiro e o poemario Nimbos, de Xosé María Díaz Castro.
O 112 Galicia rexistra os seus picos de emerxencia durante as tardes e noites de verán. Os meses estivais traen consigo un cambio nos hábitos da poboación galega: días máis longos, noites máis activas e un aumento significativo das incidencias xestionadas polo 112. Segundo os datos, as franxas horarias con maior demanda son as 15:00 e as 20:00 horas, coincidindo cun estilo de vida máis intenso e prolongado durante o verán. En 2023, o servizo rexistrou medias de 1.300 intervencións entre as 15:00 e as 16:00 horas, e case 1.500 (1.484) entre as 19:00 e as 20:00 horas durante xuño, xullo e agosto. Aínda que en 2024 houbo un descenso global de incidencias (233.289 anuais), estas franxas mantiveron cifras elevadas: máis de 1.000 chamadas á tarde e 1.200 á noite no mesmo período.
O Goberno galego incrementará o orzamento destinado á formación do persoal dos servizos de prevención de incendios forestais ata os 1,8 millóns de euros no bienio 2025-2026, o que supón un 19% máis que no período anterior. Esta medida enmárcase no Plan de Prevención e Defensa contra os Incendios Forestais de Galicia (Pladiga), cuxo obxectivo é minimizar o impacto ecolóxico, económico e social dos lumes, optimizando os recursos dispoñibles. O compromiso formativo da Consellería do Medio Rural xa se reflectiu en 2024, cando se impartiron 473 cursos con 11.447 participantes e máis de 108.000 horas de adestramento.
