Notas de prensa

Aberto o prazo para as candidaturas aos Premios da Cultura Galega 2013

O Consellería de Cultura, Educación e Ordenación Universitaria abre o prazo de presentación das candidaturas para participar nos Premios da Cultura Galega 2013, unha edición marcada pola incorporación dunha nova modalidade dedicada á lingua, en recoñecemento do labor a prol da valoración e da extensión do uso do galego, como recolle hoxe o ‘Diario Oficial de Galicia’ (DOG).

O obxectivo destes galardóns é pór en valor e darlle visibilidade ao traballo desenvolvido en beneficio da cultura galega nos ámbitos da música, das artes escénicas, do audiovisual, do patrimonio cultural, da proxección exterior e, a partir desta edición, tamén da lingua.

As asociacións e institucións de Galicia teñen desde hoxe un prazo de dous meses para presentar as candidaturas daquelas persoas e entidades que se consideren con méritos suficientes, de forma argumentada e probada, para seren distinguidas en cada unha das modalidades. Así, a concesión destes premios será un acto de agradecemento colectivo ao labor creativo e ao esforzo polo desenvolvemento cultural de Galicia que realizan día tras día artistas, profesionais, entidades e agrupacións sociais, dentro e fóra das nosas fronteiras.

Para a concesión destes premios constituirase un xurado formado por un total de 10 membros e presidido polo conselleiro de Cultura, Educación e Ordenación Universitaria, Xesús Vázquez Abad, que contará con representantes das principais institucións de Galicia e profesionais do sector.

Nova modalidade

O uso e a valoración social do idioma propio de Galicia estará premiado nesta convocatoria dos Premios da Cultura Galega 2013, converténdose na principal novidade desta edición. Así, o Premio da Cultura Galega de Lingua recoñecerá o traballo a favor da valoración e extensión do uso da lingua galega.
.
No caso dos Premios á Cultura Galega de Letras, de Artes Plásticas, de Artes Escénicas, e de Audiovisual, valoraranse os méritos especiais no que atinxe ao desenvolvemento de recursos expresivos, investigación de linguaxes propias, innovación no plano creativo, creacións de código de intercambio con outras sociedades e outros aspectos que contribúan a fortalecer e ampliar o sistema literario galego, a creación plástica galega, as artes escénicas da nosa terra, e a creación audiovisual galega –respectivamente– e a súa imaxe pública.

Para o Premio de Patrimonio Cultural terase en conta a traxectoria meritoria vinculada á protección, conservación e difusión da nosa riqueza cultural. Por outra banda, o Premio Cultura Galega á Promoción Cultural de Galicia, recoñecerá a traxectoria vinculada á difusión cultural da comunidade no exterior, que contribúa a proxectar dentro e fóra do territorio galego, a riqueza e valor da cultura galega en calquera campo e a través de calquera medio convencional ou virtual.

A modalidade de Música valorará especialmente a achega para reforzar a imaxe desta arte como creadora dunha linguaxe galega de calidade, con personalidade propia e con capacidade para se integrar nos escenarios internacionais.

Candidaturas

As candidaturas poderán ser presentadas por institucións e entidades culturais ou profesionais, públicas ou privadas, relacionadas co obxecto de cada premio, aínda que os candidatos non poderán postularse a si mesmos. En cada unha das modalidades concederase un único premio, que consistirá nunha escultura ou obxecto conmemorativo realizado por un artista galego de recoñecido prestixio e nun diploma acreditativo.

Promover a excelencia

Con esta nova convocatoria, a Xunta de Galicia recoñece a excelencia nos diversos ámbitos da cultura, desde as letras ás artes plásticas, a música, a lingua, o patrimonio, as artes escénicas, o audiovisual e a súa expansión no mundo, o que constitúe unha mostra do mellor da vitalidade cultural de Galicia na actualidade. Desta maneira, estes galardóns contribúen a proxectar e darlle visibilidade ao traballo realizado en prol da cultura galega de persoas e entidades que se consideren con méritos abondos para contaren con esta distinción en cada unha das modalidades.