sábado, 19 de julio de 2025
A Consellería de Cultura, Educación e Ordenación Universitaria apoia a celebración do V Festival Internacional de Teatro de Ourense (FITO), que se desenvolverá do 5 ao 20 de outubro na cidade das Burgas coa participación de 14 compañías de distintos xéneros e procedencias. Teatro de rúa, danza, teatro contemporáneo, clown e tamén música conforman o abano de propostas que acollerá a cita ourensá, protagonizada este ano por 5 grupos galegos e outras 9 formacións doutras comunidades españolas, Europa e Latinoamérica.
Organizado pola compañía Sarabela e dirixido por Ánxeles Cuña, o FITO é un dos festivais máis importantes, por traxectoria e contidos, do circuíto de exhibición galego. O director da Agadic (Axencia Galega das Industrias Culturais), Juan Carlos F. Fasero, participou hoxe en representación da Consellería de Cultura e Educación na rolda de prensa do certame, na que explicou que o FITO é un dos 8 eventos escénicos subvencionados este ano a través da nova convocatoria pública de axudas a festivais, pola que este ano resultaron beneficiados outros 15 festivais de música e á que se destina un importe global próximo aos 350.000 euros. En concreto, o FITO resultou adxudicatario dunha subvención de 20.100 euros.
O director da Agadic, que compartiu o acto con Ánxeles Cuña; María Lameiras, vicerreitora do Campus de Ourense da Universidade de Vigo; Olga Mojón, directora do Teatro Principal de Ourense; e Margarita Martín, alcaldesa en funcións de Ourense; destacou o esforzo que realizan as distintas administracións públicas xunto á compañía sarabela para continuar cos niveis de calidade do FITO, ao tempo que fixo un chamamento á cidadanía para que consuma cultura e acuda ao teatro.
Teatro galego emerxente
O FITO 2012 amosará os últimos espectáculos de cinco compañías galegas, seleccionadas polos organizadores por tratárense de formacións emerxentes que achegan novos estilos e poéticas. Trátase de Voadora, que escenificará Tokio 3; Il Maquinario, que representará O home almofada; Demolicións Ferreira & Cía, con Edison, ou as mil demostracións de cómo non facer unha lámpada eléctrica; Ibuprofeno Teatro con A filla de Woody Allen e Inversa Teatro con Kamouraska.
Tamén figuran na carteleira outras 8 compañías de fóra de Galicia, como son Teatro Tascábile de Bérgamo (Italia), Julio Adreãu (Brasil), Granhoj Dans (Dinamarca), Malayerba (Ecuador), Goliardos (Madrid), Mamafloriana e Kamikaze/Carmen Machi (Madrid), Teatro los lunes (Madrid) e o cómico francés Patrice Thibaud, que pechará o festival o sábado 20 co seu espectáculo Cocoricó. Completa a programación o concerto Estou lá. Músicas da lusofonía, a cargo do grupo de artistas internacional que integran João Afonso, Eneida Marta, Najla Shami, Couple Coffe, Xoán Curiel, S.Sales, P. Silva e P. Vidal.
As funcións terán lugar no escenario e na Sala Azul do Auditorio Municipal, no Teatro Principal, na Sala Multiusos do campus universitario e noutros emprazamentos ao aire libre.
Ademais das actuacións artísticas, o FITO 2012 ofrece o curso titulado O actor no solo narrativo, que o profesor Julio Adrião impartirá do 8 ao 11 de outubro; así como a presentación do último número da Revista Galega de Teatro o xoves 18.
O 112 Galicia rexistra os seus picos de emerxencia durante as tardes e noites de verán. Os meses estivais traen consigo un cambio nos hábitos da poboación galega: días máis longos, noites máis activas e un aumento significativo das incidencias xestionadas polo 112. Segundo os datos, as franxas horarias con maior demanda son as 15:00 e as 20:00 horas, coincidindo cun estilo de vida máis intenso e prolongado durante o verán. En 2023, o servizo rexistrou medias de 1.300 intervencións entre as 15:00 e as 16:00 horas, e case 1.500 (1.484) entre as 19:00 e as 20:00 horas durante xuño, xullo e agosto. Aínda que en 2024 houbo un descenso global de incidencias (233.289 anuais), estas franxas mantiveron cifras elevadas: máis de 1.000 chamadas á tarde e 1.200 á noite no mesmo período.
O Goberno galego incrementará o orzamento destinado á formación do persoal dos servizos de prevención de incendios forestais ata os 1,8 millóns de euros no bienio 2025-2026, o que supón un 19% máis que no período anterior. Esta medida enmárcase no Plan de Prevención e Defensa contra os Incendios Forestais de Galicia (Pladiga), cuxo obxectivo é minimizar o impacto ecolóxico, económico e social dos lumes, optimizando os recursos dispoñibles. O compromiso formativo da Consellería do Medio Rural xa se reflectiu en 2024, cando se impartiron 473 cursos con 11.447 participantes e máis de 108.000 horas de adestramento.
