sábado, 19 de julio de 2025
A Cidade da Cultura de Galicia acollerá o mes de outubro o I Encontro Ibérico de Casas Museos, unha iniciativa que conta coa colaboración da Consellería de Cultura, Educación e Ordenación, a través da Secretaría Xeral de Cultura. Será neste marco onde se materializará a constitución da Asociación Ibérica das Casas Museo de Escritores, unha iniciativa pioneira que integrará entidades de Portugal e do conxunto do Estado español.
Segundo explicou en rolda de prensa o secretario xeral de Cultura, Anxo Lorenzo, esta iniciativa nova nace coa pretensión de ampliar a difusión dos escritores e das súas obras no ámbito ibérico e de favorecer o intercambio de experiencias e o diálogo entre as casas museo e as fundacións de autor dos dous países.
O secretario xeral estivo acompañado no acto de presentación pola directora-xerente da Fundación Cidade da Cultura, Beatriz González Loroño; polo técnico de Cultura e membro da Xunta de Goberno da Asociación de Casas Museos e Fundacións de Escritores (ACAMFE) Antonio Piñeiro e mais polo actual presidente da Fundación Curros Enríquez Casa dos Poetas, Antonio Mouriño.
Maior proxección para os nosos escritores
Constitúe para nós dixo o secretario xeral unha honra que sexan as casas museo de Galicia, escaparates e espazos de preservación e estudo dos nosos mellores escritores, as que lideren esta iniciativa. Tamén destacou que acoller en Galicia, e particularmente na Cidade da Cultura, a constitución da primeira asociación que une as casas museo de Portugal e do conxunto do Estado, contribuirá tamén a reforzar o papel activo das nosas casas museo e, en consecuencia, a unha maior proxección dos nosos escritores xa clásicos.
Antonio Piñeiro informou de que a ACAMFE leva dous anos traballando, en colaboración coas casas museo de Portugal, para poder materializar a constitución da asociación. Respecto do encontro, indicou que nestes momentos está confirmada a participación de preto de 50 entidades.
Nesta ampliada perspectiva ibérica no plano da difusión cultural vai ter lugar do 9 ao 13 de outubro o I Congreso Ibérico de Casas Museo, un primeiro punto de encontro das casas museo dos dous países, que terá como sedes as cidades de Santiago de Compostela, Vila Nova de Famalicão e Guimarae͂s e que contará co apoio e co acompañamento institucional da Consellería de Cultura e Educación.
Diversos relatorios, roteiros literarios e visitas a espazos culturais, entre outras actividades, conformarán o programa do encontro, no que estarán representandas entidades e institucións como o Consello da Cultura Galega, a Real Academia Galega ou a Casa Museo de Rosalía de Castro.
O 112 Galicia rexistra os seus picos de emerxencia durante as tardes e noites de verán. Os meses estivais traen consigo un cambio nos hábitos da poboación galega: días máis longos, noites máis activas e un aumento significativo das incidencias xestionadas polo 112. Segundo os datos, as franxas horarias con maior demanda son as 15:00 e as 20:00 horas, coincidindo cun estilo de vida máis intenso e prolongado durante o verán. En 2023, o servizo rexistrou medias de 1.300 intervencións entre as 15:00 e as 16:00 horas, e case 1.500 (1.484) entre as 19:00 e as 20:00 horas durante xuño, xullo e agosto. Aínda que en 2024 houbo un descenso global de incidencias (233.289 anuais), estas franxas mantiveron cifras elevadas: máis de 1.000 chamadas á tarde e 1.200 á noite no mesmo período.
O Goberno galego incrementará o orzamento destinado á formación do persoal dos servizos de prevención de incendios forestais ata os 1,8 millóns de euros no bienio 2025-2026, o que supón un 19% máis que no período anterior. Esta medida enmárcase no Plan de Prevención e Defensa contra os Incendios Forestais de Galicia (Pladiga), cuxo obxectivo é minimizar o impacto ecolóxico, económico e social dos lumes, optimizando os recursos dispoñibles. O compromiso formativo da Consellería do Medio Rural xa se reflectiu en 2024, cando se impartiron 473 cursos con 11.447 participantes e máis de 108.000 horas de adestramento.
