martes, 16 de junio de 2026
O Salón Teatro de Santiago acolle tres funcións de 0,7% Molotov, a última produción da compañía Teatro de Ningures, escrita e dirixida por Santiago Cortegoso. A peza, que lle valeu ao dramaturgo pontevedrés o Premio Rafael Dieste de Escrita Dramática e pola que figura como finalista aos Premios Max de Artes Escénicas na categoría de Mellor Autor Teatral en Galego e aos María Casares como Mellor Texto Orixinal, poderá verse no escenario do Centro Dramático Galego (CDG) o venres 16 e sábado 17 ás 20.30 horas; así como o domingo 18 ás 18.00 horas.
A actriz Rocío González e o actor Salvador del Río interpretan a unha neohippy solidaria que acaba de chegar de África (Ela) e a un nihilista solitario (El) que a contrata para facer a vendima. Ela descobre un lugar no que atopar unha identidade libre de conflitos, no que ser auténtica; e El está de volta dunha vida urbana hipócrita e consumista, na que vendeu a conciencia e a coherencia política en cómodos prazos.
Armando Martén e Ana Beatriz Pérez, bailaríns da compañía de danza Entremans, acompañan os monólogos interiores dos dous personaxes, reflectindo co movemento o que El e Ela están pensando.
Personaxes en conflito
0,7% Molotov trata con ironía e humor o tema do compromiso político e a dificultade de adoptalo sen caer en contradicións. A obra amosa personaxes en conflito con eles mesmos e cos demais, que procuran a liberdade, a felicidade e a identidade. Deste xeito, a través do personaxe masculino, ponse de manifesto a frustración ante a imposibilidade de cambiar un mundo desigual e inxusto, onde a solidariedade e o compromiso poden entrañar un discurso hipócrita. Escéptico e desencantado, pasou de mozo soñador a socialdemócrata acomodado, consciente de que o mundo occidental aspira a manter o seu estilo de vida consumista. Pola contra, Ela, aínda que vive cos seus propios conflitos de identidade, está convencida de que as cousas poden mudar. Idealista, enérxica e cooperante, procura o seu lugar no mundo.
Na produción de Teatro de Ningures colaboraron Paco Alfaro no deseño da iluminación, Anxo Graña na música, Pablo Giráldez O Pastor na escenografía e Marina Bañobre no vestiario.
As entradas para as tres funcións de 0,7% Molotov poranse á venda no despacho de billetes do Salón Teatro desde dúas horas antes do comezo de cada representación. Tamén se poden adquirir por adiantado na billeteira electrónica a través do teléfono 902 43 44 43 ou da web http://entradas.novagaliciabanco.es. O prezo das localidades é de 10 euros para as funcións do venres e do sábado (cun desconto do 40% para estudantes, xubilados, usuarios do carné xoven, desempregados e determinados colectivos profesionais) e de 5 euros para o domingo, día do espectador.
Tralo paso deste espectáculo, o Salón Teatro continuará a súa programación o vindeiro xoves 22 co concerto de presentación do disco Sarahyba a cargo do grupo Liorna, o primeiro dos incluídos no Ciclo ST Música Presente 2012.
A intelixencia artificial (IA), a súa gobernanza e o impacto na organizacións públicas centraron o II Encontro de Equipos de Tecnoloxías da Información e Comunicacións (TIC) das comunidades autónomas, celebrado hoxe en Madrid, no marco do Foro de Dixitalización das Comunidades Autónomas.A Xunta de Galicia estivo representada polo director da Axencia para a Modernización Tecnolóxica de Galicia (Amtega), Damián Rey, ao que acompañaron os responsables da Xerencia e das áreas de Administración Dixital, Infraestruturas e Seguridade, Solucións Tecnolóxicas Sectoriais, Transformación Dixital da Facenda Pública e a Oficina de Apoio Estratéxico e Planificación.
Deseñado e posto en marcha pola Consellería de Medio Ambiente e Cambio Climático a través de MeteoGalicia un servizo meteorolóxico de referencia na Comunidade, o chamado Sistema de Propagación de Incendios de Galicia (Spigal) permitirá dotar o operativo de loita contra o lume da Xunta dunha ferramenta tecnolóxica propia con capacidade para adaptarse á realidade en vivo, comparar distintos escenarios de evolución dun mesmo incendio e avaliar as medidas e actuacións en materia de extinción. Spigal superou xa unha fase de probas a partir dos datos reais dos incendios do verán pasado e está listo para entrar en funcionamento.
