Notas de prensa

A Academia Galega do Audiovisual pon en marcha un novo Foro Aberto na CDG

O director da Axencia Galega das Industrias Culturais, Juan Carlos F. Fasero, asistiu á inauguración do Foro Academia Aberta, organizado pola Academia Galega do Audiovisual e que se celebra na Cidade da Cultura de Galicia. No acto, Juan Carlos F. Fasero estivo acompañado polo presidente da Academia Galega do Audiovisual, Antonio Mourelos; polo vicepresidente deste organismo, Jorge Coira, e polo director de cine Eduardo Chapero-Jackson, que ofreceu despois unha masterclass sobre novas formas de facer cine en España.

Durante a súa intervención, Juan Carlos F. Fasero definiu ao sector audiovisual como “estratéxico para a cultura galega” e destacou “a profesionalidade dos seus traballadores e a calidade da súa oferta” como os factores que lle permitiron acadar unha posición de referencia. O titular da Agadic fixo referencia aos “retos decisivos” aos que se enfronta a industria audiovisual nestes momentos, no que o sector “ten que superar o proceso de redefinición da produción e do consumo ao que obrigan as novas tecnoloxías”. Con todo, amosouse convencido de que “a chave para superar calquera desafío, pasado ou futuro, radicará no talento, a creatividade e a innovación”.

De feito, lembrou que a evolución deste sector foi “unha sorte de loita continua da que sempre saíu victorioso”, marcando un camiño no que, subliñou, “converteuse nun sobranceiro exemplo de industria cultural, capaz de xerar emprego e actividade económica e realizar chegas ao noso acervo cultural”. Fernández Fasero gabou a iniciativa da Academia Galega do Audiovisual de ofrecer durante as xornadas de hoxe e mañá as masterclass de Eduardo Chapero-Jackson e de Nacho Vigalondo, “dous directores que reúnen xuventude, talento e profesionalidade, que teñen traballado en case todos os eidos do audiovisual e que que xa recibiron diversos recoñecementos”.

Nesta liña, agradeceu á Academia Galega do Audiovisual que elixise a Cidade da Cultura como sede para a nova edición do seu Foro Academia Aberta e lembrou que “unha das metas deste complexo cultural é erixirse en punto de encontro para o diálogo”. “Nesta Cidade sempre haberá un espazo destacado para os pensamentos e as palabras de aqueles que traballan por e para a cultura de Galicia”, engadiu. Por iso, celebrou a oportunidade de acoller unha actividade dunha asociación “que reúne no seu seo a boa parte dos artistas, creadores e profesionais dun sector estratéxico da nosa cultura”.

Dúas clases maxistrais

A Academia Galega do Audiovisual presenta unha nova edición do seu Foro Academia Aberta. Nesta ocasión o tema será as novas formas de facer cine en España. Eduardo Chapero-Jackson, director da película Verbo, e Nacho Vigalondo, director de Los Cronocrímenes e Extraterrestre, impartirán sendas masterclass no Auditorio da Biblioteca de Galicia, na Cidade de Cultura.

Na súa clase, que terá lugar hoxe entre as 16,00 e as 20,00 horas, Eduardo Chapero-Jackson fará un achegamento a todos os ingredientes que compoñen unha obra cinematográfica, como son a natureza humana, a dramaturxia, a interpretación, a dirección de actores, a posta en escena, gramática visual, fotografía e iluminación, e arte, música e edición. O director empregará como exemplos algúns dos seus propios traballos e compartirá a súa propia experiencia e aprendizaxe cos alumnos.

Pola súa banda, Nacho Vigalondo ofrecerá mañá, xoves 22 de decembro, a súa masterclass. A través de exemplos propios e alleos, o director tentará desentrañar os motivos, mecanismos e debilidades que hai detrás da composición dunha secuencia cinematográfica. O cineasta analizará escenas da súa última película e doutros filmes de actores consagrados, estudando o porqué das decisións que hai detrás de cada plano.