Notas de prensa

Cultura recibe os fondos dixitalizados da Fundación Vicente Risco

A Consellería de Cultura e Turismo vén de recibir un novo lote de copias dixitalizadas dos documentos que forman parte do fondo bibliográfico da Fundación Vicente Risco para a súa conservación e difusión a través da Biblioteca de Galicia. Esta vía de colaboración iniciouse o pasado ano 2010 co obxectivo de protexer e difundir o rico legado bibliográfico e documental que alberga esta institución. En virtude do convenio asinado coa Consellería de Cultura e Turismo, a Fundación Vicente Risco entregou copias de manuscritos, debuxos, libretas de notas e diverso material empregado polo ilustre galeguista para o seu almacenamento e consulta na Cidade da Cultura.

A Fundación Vicente Risco fai entrega dos resultados deste proceso de descrición bibliográfica e de dixitalización á Xunta de Galicia para que a Fundación Cidade da Cultura os inclúa nos fondos dixitais da Biblioteca de Galicia e así podan ser estudados e difundidos publicamente mediante as novas tecnoloxías da comunicación. Ambas institucións consideran os fondos da Fundación Vicente Risco como un tesouro bibliográfico e documental fundamental, único e singular do patrimonio galego.

Dentro das seus obxectivos, a Fundación Cidade da Cultura de Galicia ten como función a creación, explotación e promoción de centros de conservación, produción, exhibición e consumo cultural, comunicativo e tecnolóxico, que constitúan un espazo multifuncional, multidisciplinar e aglutinador propicio á interacción cultural. Deste xeito, considerase esencial a colaboración entre entidades do sector público e privado para contribuír á defensa e á promoción do patrimonio cultural galego.

Documentos de gran valor cultural

A Fundación Vicente Risco leva meses colaborando coa Fundación Cidade da Cultura de Galicia para dixitalizar as obras manuscritas da biblioteca de Vicente Martínez Risco como Bicéfalo de Promonta (manuscrito de 125 páxinas) ou La puerta de paja (manuscrito de 131 páxinas), ambas as dúas da autoría do escritor ourensán, así como A familia de Pascual Duarte (manuscrito da tradución feita por Vicente Risco de 180 páxinas) da obra de Camilo José Cela.

Asemade, tamén se están dixitalizando fondos especiais da Fundación como os manuscritos impresos de Traballos sobre o celtismo. Neste grupo destacan Civilización europea, Magnae Syntesis liber vel opera Omnia, Notas e bibliografías ou Referencia Irlandesa, así como outras obras da carpeta sobre o celtismo como Irlanda por dentro y por fuera (tradución de Enrique Díaz-Canedo), El fanatismo sinfinista: a proposito del problema Irlandés ou unha separata de Americo Castro titulada Algo sobre el celtismo. A documentación sobre a obra Mitteleuropa recollida en libretas de notas, debuxos, apuntes e borradores do manuscrito tamén están sendo obxecto de dixitalización, así como a colección de traballos sobre etnografía e documentación diversa sobre O Carnaval, O Diablo e A Maxia. As coleccións de Vicente Risco de refráns, ditos e adiviñas, con 150 fichas manuscritas cada unha delas, tamén serán dixitalizadas.